ഹരിത തിരഞ്ഞെടുപ്പ്: ഉദ്യോഗസ്ഥർക്ക് പരിശീലനം നൽകി

News Desk

29 November 2025 11:45 AM

ഇടുക്കി ജില്ലയിലെ 10 കേന്ദ്രങ്ങളിലായി തിരഞ്ഞെടുപ്പ് ഉദ്യോഗസ്ഥര്‍ക്കുള്ള ഹരിത തിരഞ്ഞെടുപ്പ് പരിശീലനങ്ങള്‍  പൂര്‍ത്തിയായി. 25 മുതല്‍ 28 വരെ സംഘടിപ്പിച്ച പരിപാടിയിൽ തദ്ദേശ സ്ഥാപന പൊതു തിരഞ്ഞെടുപ്പ് ചുമതലയുള്ള 1800 ഉദ്യോഗസ്ഥര്‍ക്കാണ് പരിശീലനം നല്‍കിയത്. നഗരസഭകളില്‍ ശുചിത്വ മിഷന്‍ യങ് പ്രൊഫഷനലുകളും, ബ്ലോക്ക് കേന്ദ്രങ്ങളില്‍ ശുചിത്വ മിഷന്‍ റിസോഴ്‌സ് പേഴ്‌സന്മാരും ഹരിത ചട്ട പാലനം സംബന്ധിച്ച ക്ളാസുകള്‍ നയിച്ചു.

ബന്ധപ്പെട്ട എല്ലാ പ്രവര്‍ത്തനങ്ങളിലും ആദ്യാവസാനം ഹരിത ചട്ടം പാലിക്കുന്നത് സംബന്ധിച്ച്  പരിശീലന കേന്ദ്രങ്ങള്‍, ഇ.വി.എം കമ്മീഷനിംഗ് കേന്ദ്രങ്ങള്‍, സ്വീകരണ, വിതരണ പോളിംഗ് സ്റ്റേഷന്‍, വോട്ടെണ്ണല്‍ കേന്ദ്രങ്ങള്‍ എന്നിവിടങ്ങളില്‍ ഹരിതപെരുമാറ്റചട്ടം ഉറപ്പുവരുത്തുക, തിരഞ്ഞെടുപ്പ് കമ്മീഷന്‍, ശുചിത്വമിഷന്‍ എന്നിവ പുറത്തിറക്കിയ ഹരിതപെരുമാറ്റചട്ടം സംബന്ധിച്ച് സർക്കുലര്‍, മാർഗനിർദേശങ്ങള്‍ എന്നിവ പ്രകാരമുള്ള പ്രവർത്തനങ്ങള്‍ നടപ്പിലാക്കുന്നുണ്ടെന്ന് ഉറപ്പുവരുത്തുക, ശുചിത്വമിഷന്റെ സഹായത്തോടെ ഹരിതപാലനചട്ടം സംബന്ധിച്ച ബോധവൽക്കരണ പ്രവർത്തനങ്ങള്‍ സംഘടിപ്പിക്കുക, തിരഞ്ഞെടുപ്പ് കമ്മീഷന്‍ ഹരിതപെരുമാറ്റചട്ടം സംബന്ധിച്ച് അതത് സമയങ്ങളില്‍ എടുക്കുന്ന തീരുമാനങ്ങള്‍ നടപ്പില്‍ വരുത്തുന്നതിനാവശ്യമായ ഇടപെടലുകള്‍ നടത്തുക എന്നീ വിഷയങ്ങളിലാണ് ഉദ്യോഗസ്ഥര്‍ക്ക് പരിശീലനം നല്‍കിയത്.

ജില്ലയുടെ പല ഭാഗങ്ങളിലും നിരോധിത ഫ്‌ളക്‌സുകള്‍ ബാനറുകള്‍ എന്നിവ ഉപയോഗിച്ച് പ്രചരണം നടത്തുന്നതിനെതിരെ എന്‍ഫോഴ്‌സ്‌മെന്റ് സ്‌ക്വാഡുകളും, ആന്റി ഡിഫേസ്‌മെന്റ് സ്‌ക്വാഡും നടപടി സ്വീകരിക്കുമെന്നും നിയമലംഘനം നടത്തുന്ന സ്ഥാനാര്‍ത്ഥികള്‍, ഏജന്‍സികള്‍ എന്നിവര്‍ക്കെതിരെ പിഴ അടക്കമുള്ള കര്‍ശന നടപടി സ്വീകരിക്കുമെന്നും, അത്തരത്തില്‍ സ്ഥാപിക്കുന്ന ബാനറുകളും, ബോര്‍ഡുകളും നീക്കം ചെയ്യുമെന്നും ഉദ്യോഗസ്ഥര്‍ അറിയിച്ചു.

Related News