പാസില്ലാതെ എത്തിയ ആള്ക്ക് കൊവിഡ് ; വാളയാറില് സമരത്തിന് പോയ യു.ഡി.എഫ് എം.പിമാരും എം.എല്.എമാരും നിരീക്ഷണത്തില് പോകണം
തിരുവനന്തപുരം: വാളയാറില് സമരത്തിന് പോയ യു.ഡി.എഫ് എം.പിമാരും, എം.എല്.എമാരും നിരീക്ഷണത്തില് പോകണമെന്ന നിര്ദേശവുമായി പാലക്കാട് ജില്ലാ മെഡിക്കല് ബോര്ഡ്. വാളയാര് വഴി പാസില്ലാതെ എത്തിയ ആള്ക്ക് കൊവിഡ് സ്ഥിരീകരിച്ചിരുന്നു. ഇതേ തുടര്ന്നാണ് സ്വയം നിരീക്ഷണത്തില് പോകാന് മെഡിക്കല് ബോര്ഡ് നിര്ദേശം നല്കിയിരിക്കുന്നത്.
രമ്യാ ഹരിദാസ്, ടി.എന് പ്രതാപന്, വി.കെ ശ്രീകണ്ടന്, അനില് അക്കര, ഷാഫി പറമ്പില് തുടങ്ങി ജനപ്രതിനിധികള്ക്കാണ് നിരീക്ഷണത്തില് പോകാന് മെഡിക്കല് ബോര്ഡ് നിര്ദേശം നല്കിയിരിക്കുന്നത്. സ്ഥലത്തുണ്ടായിരുന്ന മാദ്ധ്യമപ്രവര്ത്തകരും നിരീക്ഷണത്തില് പോകണമെന്ന് മെഡിക്കല് ബോര്ഡ് നിര്ദേശിച്ചിട്ടുണ്ട്.
അതേസമയം, ഒരു ജനപ്രതിനിധിയും ആരോഗ്യവകുപ്പ് നിര്ദേശങ്ങള് ലംഘിക്കരുതെന്നും കൊവിഡ് ആര്ക്കും പിടിപ്പെടാമെന്നും വ്യവസായ മന്ത്രി ഇ.പി ജയരാജന് പറഞ്ഞു. ഏറ്റവും ഫലപ്രദമായ നിലയില് പ്രതിരോധ പ്രവര്ത്തനം നടത്തുകയാണ് ഇപ്പോള്. അതിനാല് തന്നെ ആരോഗ്യവകുപ്പിന്്റെ നിര്ദേശങ്ങളെല്ലാം എല്ലാവരും പാലിക്കണമെന്നും മന്ത്രി പറഞ്ഞു. വാളയാറില് യു.ഡി.എഫ് ജനപ്രതിനിധികള് നടത്തിയ പ്രതിഷേധത്തെ പരോക്ഷമായി വിമര്ശിച്ചായിരുന്നു മന്ത്രിയുടെ പ്രതികരണം.
എം.പിക്കും എം.എല്.എക്കും കൊവിഡ് വരില്ലെന്ന് ആരും ചിന്തിക്കരുത്. ആര്ക്കും കൊവിഡ് പിടിപെടാം. നല്ല നാളേക്ക് വേണ്ടി എല്ലാവരും ചിന്തിക്കണം. ഈ ഘട്ടത്തില് രാഷ്ട്രീയം പറയാനാഗ്രഹിക്കുന്നില്ലെന്നും ഇപ്പോള് തര്ക്കത്തിനില്ലെന്നും ഇപി ജയരാജന് പറഞ്ഞു.
നിലവിലെ പരിശോധന രീതികളും പ്രതിരോധ പ്രോട്ടോക്കോളും എല്ലാവരും പാലിക്കണമെന്നും അദ്ദേഹം പറഞ്ഞു. നിലവിലെ പരിശോധരീതികള് ആരും തെറ്റിക്കരുത്. ജനവസേവനം എന്നത് രോഗ്യവ്യാപനം തടയാനുള്ള ശ്രമങ്ങള്ക്ക് ഒപ്പം നില്ക്കലാണ്. ബഹളം വയ്ക്കല് അല്ല. മദ്യ ഉപയോഗം അനിനിയന്ത്രിതമാണെന്നും അതിനെ നിയന്ത്രിക്കാനാണ് വിര്ച്വല് ക്യൂവും ആപ്പും കൊണ്ടുവരുന്നതെന്നും ഇ.പി ജയരാജന് പറഞ്ഞു.