ജലീല് രാജിവയ്ക്കേണ്ട സാഹചര്യമില്ലെന്ന് മുഖ്യമന്ത്രി
തിരുവനന്തപുരം: മന്ത്രി കെ.ടി ജലീല് രാജിവയ്ക്കേണ്ട സാഹചര്യമില്ലെന്ന് മുഖ്യമന്ത്രി പിണറായി വിജയന്. എന്ത് വസ്തുതയുടെ അടിസ്ഥാനത്തിലാണ് രാജി ആവശ്യപ്പെടുന്നതെന്ന് അദ്ദേഹം ചോദിച്ചു.
കെട്ടിച്ചമച്ച് അപവാദം പ്രചരിപ്പിച്ചാല് അതിന്റെ പേരില് രാജിവയ്ക്കേണ്ടതില്ലെന്ന് മുഖ്യമന്ത്രി വാര്ത്താ സമ്മേളനത്തില് പറഞ്ഞു. ഒരു കുറ്റവും ജലീലിനെതിരെയില്ല. അദ്ദേഹം എല്ലാ കാര്യങ്ങളും തുറന്നുപറഞ്ഞിട്ടുണ്ട്.
യുഎഇ കോണ്സുലേറ്റുമായി ബന്ധപ്പെട്ട ചില വിവരങ്ങള് അന്വേഷണ ഏജന്സി ചോദിച്ചു മനസിലാക്കി എന്നാണ് അറിയുന്നത്. അതിനപ്പുറം വലിയ കാര്യങ്ങളില്ല.
സര്ക്കാരിനെതിരെ മറ്റൊന്നും പറയാനില്ലാത്തതുകൊണ്ട് പ്രതിപക്ഷം ഇല്ലാക്കഥകള് കെട്ടിച്ചമയ്ക്കുകയാണ്. ചില ആളുകള് അപവാദം പ്രചരിപ്പിക്കുന്നത് തൊഴിലായി സ്വീകരിച്ചിട്ടുണ്ട്. അതിന്റെ ഭാഗമാണ് ജലീലിനെതിരായ ആരോപണങ്ങളെ കാണാന് കഴിയുകയെന്നും മുഖ്യമന്ത്രി പറഞ്ഞു.