ഒന്നിക്കാം ലഹരിക്കെതിരെ- സർക്കാർ ജീവനക്കാർക്ക് ലഹരി വിരുദ്ധ ബോധവത്കരണ ക്ലാസ്

News Desk

06 November 2025 01:20 PM

എക്സൈസ് വകുപ്പിൻ്റെയും വിമുക്തി മിഷൻ്റെയും ആഭിമുഖ്യത്തിൽ സർക്കാർ ജീവനക്കാർക്ക് ലഹരി വിരുദ്ധ ബോധവത്കരണ ക്ലാസ് നടത്തി. ജില്ലാ കളക്ടർ ദിനേശൻ ചെറുവാട്ട് പരിപാടി ഉദ്ഘാടനം ചെയ്തു. സർക്കാർ ഉദ്യോഗസ്ഥർ സമൂഹത്തിന് മാതൃകയാകണമെന്നും സാമൂഹിക ഉത്തരവാദിത്തമെന്ന നിലയിൽ ലഹരി വിരുദ്ധ പ്രവർത്തനങ്ങളിൽ പങ്കാളികളാകണമെന്നും പരിപാടി ഉദ്ഘാടനം ചെയ്ത് കളക്ടർ പറഞ്ഞു.

ഹയർ സെക്കൻ്ററി വിഭാഗത്തിൽ ദേശഭക്തി ഗാനമത്സരത്തിൽ വിജയിച്ച സ്കൂൾ വിദ്യാർഥികൾക്കുള്ള സമ്മാന വിതരണവും കളക്ടർ നിർവഹിച്ചു.

ദേശഭക്തിഗാന മത്സരത്തിൽ മൂലമറ്റം ഗവ. വൊക്കേഷണൽ ഹയർ സെക്കൻഡറി സ്കൂൾ ഒന്നാം സമ്മാനവും, രണ്ടാം സമ്മാനം വെള്ളയാംകുടി സെൻ്റ്. ജെറോംസ് ഹയർ സെക്കൻഡറി സ്ക്കൂളും, മൂന്നാം സമ്മാനം കൂമ്പൻപാറ ഫാത്തിമ മാത ഗേൾസ് ഹയർ സെക്കൻഡറി സ്ക്കൂളും നേടി. സമ്മാനങ്ങൾ വിദ്യാർഥികൾ കളക്ടറിൽ നിന്ന് ഏറ്റുവാങ്ങി.

നെടുങ്കണ്ടം താലൂക്ക് ആശുപത്രി സൈക്യാട്രിസ്റ്റ് ഡോ.മെറിൻ പൗലോസ് ബോധവത്കരണ ക്ലാസ് നയിച്ചു.

കളക്ടറേറ്റ് മിനികോൺഫറൻസ് ഹാളിൽ ചേർന്ന യോഗത്തിൽ അസിസ്റ്റൻ്റ് എക്സൈസ് കമ്മീഷണർ പി.എസ് ഹരികുമാർ അധ്യക്ഷനായി. ഇടുക്കി എക്സൈസ് സർക്കിൾ ഇൻസ്പെക്ടർ സുരേഷ് പി.കെ, വിമുക്തി മിഷൻ ജില്ലാ കോ ഓർഡിനേറ്റർ ഡിജോ ദാസ് എന്നിവർ സംസാരിച്ചു.

ചിത്രം: ലഹരി വിരുദ്ധ ബോധവത്കരണ ക്ലാസ് ഉദ്ഘാടനം ചെയ്ത് ജില്ലാ കളക്ടർ ദിനേശൻ ചെറുവാട്ട് സംസാരിക്കുന്നു.