കണ്ണൂർ ജില്ലയിലെ ആദ്യ എന്യുമറേഷൻ ഫോം പൂരിപ്പിച്ചു; പത്മനാഭൻ.ടി, എപിക് നമ്പർ 309

News Desk

06 November 2025 12:30 PM

പേര് പത്മനാഭൻ.ടി, എപിക് നമ്പർ 309, പിതാവ് കൃഷ്ണൻ നായർ, മാതാവ് ദേവകി, ഭാര്യ ഭാർഗ്ഗവി.. പല കോളങ്ങൾ പൂരിപ്പിച്ച് ഒപ്പിട്ട ശേഷം ജില്ലാ കളക്ടർ അരുൺ. കെ. വിജയന് കൈമാറി. അങ്ങനെ കണ്ണൂർ ജില്ലയിലെ ആദ്യ എന്യൂമറേഷൻ ഫോം പൂരിപ്പിച്ച് നൽകി കഥാകൃത്ത് ടി. പത്മനാഭൻ തെരഞ്ഞെടുപ്പ് വോട്ടർ പട്ടിക പരിഷ്‌കരിക്കുന്ന സ്പെഷൽ ഇൻറൻസീവ് റിവിഷന്റെ ഭാഗമായി.

സംസ്ഥാനത്തൊട്ടാകെ നവംബർ നാലുമുതൽ ആരംഭിച്ച സ്‌പെഷ്യൽ ഇൻറൻസീവ് റിവിഷന്റെ ഭാഗമായാണ് ജില്ലാ കലക്ടർ അരുൺ കെ വിജയന്റെ നേതൃത്വത്തിൽ തിരഞ്ഞെടുപ്പ് ഉദ്യോഗസ്ഥർ പള്ളിക്കുന്നിലെ വസതിയിൽ എത്തി മലയാളത്തിന്റെ പ്രിയ കഥാകാരൻ ടി. പത്മനാഭന് എന്യുമറേഷൻ ഫോം നൽകിയത്. വോട്ടർ പട്ടിക പുതുക്കുന്ന നടപടികൾ സംബന്ധിച്ച് കലക്ടർ അദ്ദേഹത്തിന് വിശദീകരിച്ചു നൽകി. ‘വോട്ടവകാശം ലഭിച്ചതുമുതൽ ഇന്നേവരെ ഒരു വോട്ടു പോലും പാഴാക്കിയിട്ടില്ല. തദ്ദേശ തിരഞ്ഞെടുപ്പുകളിലും നിയമസഭാ, പാർലമെന്റ് തിരഞ്ഞെടുപ്പുകളിലും മുടങ്ങാതെ വോട്ട് ചെയ്യാറുണ്ട്’-അദ്ദേഹം പറഞ്ഞു. നടപടികൾ പൂർത്തിയാക്കി എന്യൂമറേഷൻ ഫോമിന്റെ വ്യക്തിഗത കോപ്പി ടി. പത്മനാഭന് കൈമാറിയ ശേഷമാണ് കലക്ടർ ഉൾപ്പെടെയുള്ള ഉദ്യോഗസ്ഥർ മടങ്ങിയത്.

വീടു വീടാന്തരമുള്ള വിവര ശേഖരണത്തിന്റെ ഭാഗമായി ജില്ലയിൽ എന്യൂമെറേഷൻ ഫോം വിതരണവും ശേഖരണവും നവംബർ നാലു മുതൽ ഡിസംബർ നാലു വരെ നടക്കും. ബൂത്ത് ലെവൽ ഓഫീസർമാർ 2025 ഒക്ടോബർ 27ന് നിലവിലുണ്ടായിരുന്ന വോട്ടർപട്ടിക പ്രകാരമുള്ള എല്ലാ വോട്ടർമാർക്കും എന്യൂമെറേഷൻ ഫോം നൽകി വിവരങ്ങൾ ശേഖരിക്കും. കരട് വോട്ടർപട്ടിക ഡിസംബർ ഒൻപതിനു പ്രസിദ്ധീകരിക്കും. ഇതിന്മേലുള്ള ഹിയറിങ്ങും പരിശോധനയും ഡിസംബർ ഒൻപതു മുതൽ 2026 ജനുവരി 31 വരെ നടക്കും. അന്തിമ വോട്ടർപ്പട്ടിക 2026 ഫെബ്രുവരി ഏഴിന് പ്രസിദ്ധീകരിക്കും. അർഹരായ സമ്മതിദായകർ മാത്രം ഉൾപ്പെട്ട സമ്മതിദായകപ്പട്ടിക തയ്യാറാക്കുന്നതിന്റെ ഭാഗമായായാണ് കേന്ദ്ര തിരഞ്ഞെടുപ്പ് കമ്മീഷന്റെ നേതൃത്വത്തിൽ പ്രത്യേക തീവ്ര വോട്ടർ പട്ടിക പുതുക്കൽ യജ്ഞം-2025 നടത്തുന്നത്.

അസിസ്റ്റന്റ് കലക്ടർ എഹ്‌തെദ മുഫസിർ, ഇലക്ഷൻ ഡെപ്യൂട്ടി കലക്ടർ കെ.കെ.ബിനി, ഡെപ്യൂട്ടി കലക്ടർ കെ.എസ്. അനീഷ്, ഇലക്ഷൻ വിഭാഗം സൂപ്രണ്ട് സുനിൽകുമാർ, ബൂത്ത് ലെവൽ ഓഫീസർ ശ്രീജിത, പുഴാതി വില്ലേജ് സ്‌പെഷ്യൽ വില്ലജ് ഓഫീസർ എൻ.കെ. സഹദേവൻ, ഫീൽഡ് അസിസ്റ്റന്റ് പി.പി.ഷാജു എന്നിവർ പങ്കെടുത്തു.