അജിത് ഡോവല്‍ ശ്രീനഗറില്‍; ലക്ഷ്യം ഡല്‍ഹി മോഡല്‍ കേന്ദ്രഭരണം

News Desk

06 August 2019 11:48 AM

ശ്രീനഗർ : ഭരണഘടനയിലെ 370-ാം അനുച്ഛേദം റദ്ദാക്കിയതിന് പിന്നാലെ കശ്മീരിലെ സ്ഥിതിഗതികള്‍ വിലയിരുത്താന്‍ ദേശീയ സുരക്ഷാ ഉപദേഷ്ടാവ് അജിത് ഡോവല്‍ ശ്രീനഗറിലെത്തി. കശ്മീരിലെ സുരക്ഷാക്രമീകരണങ്ങളിലും പുതിയതായി പ്രഖ്യാപിച്ച രണ്ട് കേന്ദ്രഭരണ പ്രദേശങ്ങളുടെ രൂപീകരണം ഉള്‍പ്പെടെയുള്ള വിഷയങ്ങളിലും അദ്ദേഹം വിവിധ ഉദ്യോഗസ്ഥരുമായി ചര്‍ച്ച നടത്തും.

ഡല്‍ഹി മാതൃകയിലുള്ള കേന്ദ്രഭരണമാകും കശ്മീരിലും നടപ്പിലാക്കുകയെന്ന് ഔദ്യോഗിക വൃത്തങ്ങളെ ഉദ്ധരിച്ച് ദേശീയമാധ്യമങ്ങള്‍ റിപ്പോര്‍ട്ട് ചെയ്തു. സംസ്ഥാന പോലീസിനെ പൂര്‍ണമായും കേന്ദ്രനിയന്ത്രണത്തിലാക്കും. സിവില്‍ സര്‍വീസ് ഉദ്യോഗസ്ഥരെയും മറ്റുസംവിധാനങ്ങളെയും കേന്ദ്രം നിയന്ത്രിക്കുമെന്നും റിപ്പോര്‍ട്ടുകളില്‍ സൂചിപ്പിക്കുന്നു.