ഇന്ന് സംസ്ഥാനത്ത് 3 പേർക്ക് കോവിഡ്
തിരുവനന്തപുരം: സംസ്ഥാനത്ത് ഇന്ന് മൂന്ന് പേര്ക്ക് കൊവിഡ് . മൂന്ന് പേര്ക്കും വൈറസ് ബാധ ഉണ്ടായത് സമ്പര്ക്കം മൂലമാണ്. മൂന്ന് പേരും വയനാട്ടിലുള്ളവരാണ്. കഴിഞ്ഞ ദിവസം ചെന്നൈയില് പോയി വന്ന വാഹനത്തിൻ്റെ ഡ്രൈവര്ക്ക് രോഗം സ്ഥിരീകരിച്ചിരുന്നു. ആ ഡ്രൈവറുടെ അമ്മയ്ക്കും ഭാര്യയ്ക്കും ഇദ്ദേഹത്തിൻ്റെ സഹായിയായി പോയ ക്ലീനറുടെ മകനുമാണ് ഇപ്പോള് രോഗം വന്നിരിക്കുന്നത്. മറ്റു സ്ഥലങ്ങളില് പോയി വരുമ്പോള് സ്വീകരിക്കേണ്ട മുന്കരുതലുകളില് പാളിച്ചകള് വന്നാലുണ്ടാവുന്ന അപകടമാണ് ഇതിലൂടെ കാണിക്കുന്നത്.
ഇന്ന് സംസ്ഥാനത്ത് ചികിത്സയിലുള്ള ആരുടേയും ഫലം നെഗറ്റീവായിട്ടില്ല. ഇതുവരെ 502 കേസുകള് റിപ്പോര്ട്ട് ചെയ്തു. 37 പേര് നിലവില് ചികിത്സയിലുണ്ട്. 21342 പേര് നിലവില് നിരീക്ഷണത്തിലുണ്ട്. ഇതില് 21034 പേര് വീടുകളിലും 308 പേര് ആശുപത്രിയിലുമാണ്. ഇന്നു മാത്രം 86 പേരെ ആശുപത്രിയിലേക്ക് മാറ്റി. 33800 സാംപിളുകള് ഇതുവരെ പരിശോേധനയ്ക്ക് അയച്ചു. 33605 എണ്ണം നെഗറ്റീവാണ്. 1024 ടെസ്റ്റ് ഇന്ന് നടത്തി.
സാമൂഹികവ്യാപന പരിശോധനയുടെ ഭാഗമായി മുന്ഗണനാപട്ടികയില്പ്പെട്ട 2512 സാംപിളുകള് പരിശോധിച്ചതില് 1979 എണ്ണം നെഗറ്റീവാണ്. ഇന്ന് പുതുതായി ഒരു സ്ഥലവും ഹോട്ട്സ്പോട്ടില് ഇല്ല. കണ്ണൂര് 18, കോട്ടയം 6, വയനാട് 4, കൊല്ലം 3, കാസര്കോട് 3, പത്തനംതിട്ട, ഇടുക്കി, പാലക്കാട് ജില്ലകളില് ഒരോരുത്തര് വീതം ഇങ്ങനെയാണ് ചികിത്സയിലുള്ളവരുടെ എണ്ണം.