കൊച്ചി നഗരത്തിലെ വെളളക്കെട്ട്: കളക്ടറും കോര്പ്പറേഷനും വിശദീകരണം നല്കണമെന്ന് ഹൈക്കോടതി
കൊച്ചി നഗരത്തിലെ വെള്ളക്കെട്ടില് ഇടപെട്ട് ഹൈക്കോടതി. ജില്ലാ കളക്ടറോടും കോര്പ്പറേഷനോടും ഹൈക്കോടതി റിപ്പോര്ട്ട് തേടി. കേസ് വീണ്ടും പരിഗണിക്കുന്ന ചൊവ്വാഴ്ചയ്ക്ക് മുമ്പ് റിപ്പോര്ട്ട് നല്കണം. വെള്ളക്കെട്ട് നീക്കാന് നഗരസഭയ്ക്ക് കഴിയുന്നില്ലെങ്കില് ദുരന്തനിവാരണ നിയമപ്രകാരം കളക്ടര്ക്ക് ഇടപെടാമെന്ന് ഹൈക്കോടതി അറിയിച്ചു. മുല്ലശേരി കനാലിന്റെ കാര്യത്തില് യുദ്ധകാലാടിസ്ഥാനത്തില് നടപടി വേണമെന്നും ഹൈക്കോടതി അറിയിച്ചു.
ഒറ്റ മഴയില് വെള്ളക്കെട്ടിലാകുന്ന കൊച്ചിയില് വെള്ളക്കെട്ട് നീക്കാന് നാല് വര്ഷം കൊണ്ട് കൊച്ചി കോര്പ്പേറേഷനും ജില്ലാ ഭരണകൂടവും ചെലവഴിച്ചത് 44 കോടിയോളം രൂപയാണ്. പേരണ്ടൂര് കനാലിലെ ചെളി നീക്കല്, കാനകളും കനാലുകളുടെയും വികസനം അടക്കം 49 ജോലികള്ക്കായാണ് കോര്പ്പറേഷന് 34 കോടി 66 ലക്ഷം രൂപ ചെലവഴിച്ചത്.
ജില്ലാ കളക്ടറുടെ നേതൃത്വത്തിലുള്ള ബ്രേക് ത്രൂ പദ്ധതിയുടെ ആദ്യ ഘട്ടത്തിനായി ഒന്പത് കോടി 61 ലക്ഷം രൂപയും ഇതുവരെ നല്കി കഴിഞ്ഞു. എന്നാല് നഗരത്തിലെ പലയിടത്തും വെള്ളക്കെട്ടിന് ഇപ്പോഴും പരിഹാരമായിട്ടില്ല.