ഭരണ തുടര്‍ച്ച ഉണ്ടാകുമെന്ന് സര്‍വേഫലം
തിരുവനന്തപുരം: സംസ്ഥാനത്ത് ഭരണ തുടര്‍ച്ചയുണ്ടാകുമെന്ന് ഏഷ്യാനെറ്റ് ന്യൂസ് സീ ഫോര്‍ പ്രീ പോള്‍ സര്‍വേ ഫലം. എല്‍.ഡി.എഫ് 72 മുതല്‍ 78 വരെ സീറ്റ് നേടുമെന്നാണ് സര്‍വേ. യു.ഡി.എഫിന് 59 മുതല്‍ 65 വരെ സീറ്റ് ലഭിക്കുമെന്നും മൂന്നു മുതല്‍ ഏഴുവരെ എന്‍.ഡി.എക്ക് ലഭിക്കാമെന്നും സര്‍വേ പ്രവചിക്കുന്നു. എല്‍.ഡി.എഫിന്-41, യു.ഡി.എഫിന് -39, എന്‍.ഡി.എക്ക് -18 ശതമാനം വോട്ട് ലഭിക്കും.
തെക്കന്‍ കേരളത്തില്‍ ഇടതുമുന്നണി 41 ശതമാനം വോട്ടോടെ 24 മുതല്‍ 26 സീറ്റ് വരെ നേടും. യു.ഡി.എഫിന് 12 മുതല്‍ 14 സീറ്റുവരെയേ ലഭിക്കൂ. 37 ശതമാനമാണ് വോട്ട് വിഹിതം. എന്‍.ഡി.എക്ക് 20 ശതമാനം വോട്ട് ലഭിക്കാം. ഒന്നു മുതല്‍ രണ്ടു വരെ സീറ്റ് നേടും.
മധ്യകേരളത്തില്‍ യു.ഡി.എഫിന് 23 മുതല്‍ 25 വരെ സീറ്റുകളും എല്‍.ഡി.എഫിന് 16 മുതല്‍ 18 വരെ സീറ്റുകളും എന്‍.ഡി.എക്ക് പൂജ്യം മുതല്‍ ഒരു സീറ്റ് വരെയുമാണ് പ്രവചിക്കുന്നത്. വടക്കന്‍ കേരളത്തില്‍ വ്യക്തമായ ആധിപത്യം ഇടതുമുന്നണി നിലനിര്‍ത്തും. 43 ശതമാനം വോട്ടോടെ 32 മുതല്‍ 34 വരെ സീറ്റ് ഇടതുപക്ഷം നേടും. യു.ഡി.എഫിന് 39 ശതമാനം വോട്ട് ലഭിക്കുമെങ്കിലും 24 മുതല്‍ 26 വരെ സീറ്റാണ് ലഭിക്കുക. എന്‍.ഡി.എക്ക് രണ്ടു മുതല്‍ നാലു വരെ സീറ്റ് ലഭിച്ചേക്കാമെന്നും സര്‍വേ പ്രവചിക്കുന്നു.