ഇനി ബസുകളിലെ യാത്രക്കാര്ക്കും സീറ്റ് ബെല്റ്റ് കര്ശനം: ഇല്ലെങ്കില് 1000 രൂപ പിഴ
ബസുകളില് സീറ്റ് ബെല്റ്റ് വേണമെന്ന വ്യവസ്ഥ പുതുക്കിയ മോട്ടോര്വാഹന നിയമത്തില് കര്ശനമാക്കി. മോട്ടോര്വാഹന നിയമഭേദഗതിയിലെ 194-എ എന്ന വകുപ്പിലാണ് ഈ വ്യവസ്ഥ. യാത്രക്കാരന് സീറ്റ് ബെല്റ്റ് ധരിച്ചില്ലെങ്കില് ആയിരം രൂപയാണ് പിഴ. ബസുകള്ക്ക് സീറ്റ് ബെല്റ്റ് ഇല്ലെങ്കില് ആര്.സി. ബുക്കിന്റെ ഉടമ ആയിരംരൂപ അടയ്ക്കണം. ഒരു സീറ്റിന് ബെല്റ്റില്ലെങ്കിലും എല്ലാ സീറ്റിനും ബെല്റ്റില്ലെങ്കിലും 1000 രൂപ തന്നെയാണ് പിഴ.
14 വയസ്സില് താഴെയുള്ള കുട്ടികളെ കൊണ്ടുപോകുന്ന യാത്രാവാഹനങ്ങളില് സീറ്റ് ബെല്റ്റോ കുട്ടികള്ക്കുള്ള മറ്റു സുരക്ഷാസംവിധാനങ്ങളോ ഇല്ലെങ്കിലും ഈ തുക ഒടുക്കണം. സീറ്റ് ബെല്റ്റ് ലംഘനത്തിന് പിഴ കര്ശനമാക്കുകയാണെങ്കില് സംസ്ഥാനത്തെ എല്ലാ ബസുകളും ആ ഗണത്തില്പ്പെടും. ഇതില് സ്കൂള്ബസുകളും ഉണ്ടാവും.
ബസുകളിലെ സീറ്റിങ് കപ്പാസിറ്റിയില്നിന്ന് രണ്ടുസീറ്റ് കുറച്ചശേഷം (ഡ്രൈവറും കണ്ടക്ടറും) ഉള്ള എണ്ണത്തിന്റെ നാലിലൊന്നുപേരെയാണ് നിന്ന് യാത്രചെയ്യാന് അനുവദിക്കുക. ഉദാഹരണത്തിന്, 48 സീറ്റുള്ള ബസില് 11 പേര്ക്കാണ് അനുമതി. ബസിന് പെര്മിറ്റ് കൊടുക്കുമ്പോഴുള്ള വ്യവസ്ഥയാണിത്. സീറ്റൊന്നിന് 600 രൂപയും നില്ക്കുന്ന ഒരു യാത്രക്കാരന് 210 രൂപയുമാണ് ബസിന്റെ രജിസ്ട്രേഷന് സമയത്ത് പെര്മിറ്റ് ഇനത്തില് ഈടാക്കുന്നത്.
ഒരു ബസിന്റെ പെര്മിറ്റിനുള്ള മാനദണ്ഡത്തില് കൂടുതല് യാത്രക്കാരെ കയറ്റിയാല് ഓരോ അധിക ആളിനും 200 രൂപ വീതം പിഴയടയ്ക്കണം. എങ്കിലും തുടര്യാത്ര അനുവദിക്കില്ല. യാത്രക്കാരെ അവിടെയിറക്കി ബസ് കസ്റ്റഡിയിലെടുക്കണം. യാത്രക്കാര്ക്ക് തുടര്യാത്രയ്ക്കുള്ള അവസരമൊരുക്കിയശേഷം വേണം ഇങ്ങനെചെയ്യാന്.
നില്ക്കുന്ന യാത്രക്കാരെ ഒഴിവാക്കണമെങ്കില് സംസ്ഥാനസര്ക്കാര് പ്രത്യേകം ഉത്തരവിറക്കണം. ഉത്തരവ് ഗസറ്റില് പ്രസിദ്ധപ്പെടുത്തുകയുംവേണം. ഈ ഉത്തരവിറക്കുന്നതിനെക്കുറിച്ച് സംസ്ഥാന മോട്ടോര്വാഹന വകുപ്പ് ചിന്തിച്ചിട്ടുപോലുമില്ല.