കാസര്ഗോഡ് വന് ചന്ദന വേട്ട; പിടികൂടിയത് രണ്ടര കോടിയോളം രൂപ വിലമതിക്കുന്ന ചന്ദനശേഖരം
കാസര്ഗോഡ്: ജില്ലയില് വന് ചന്ദന വേട്ട. ജില്ലാ കലക്ടറുടെ ഓഫിസിന് സമീപത്തെ വീട്ടിലാണ് ചന്ദനം പിടികൂടിയത്. കലക്ടറും സംഘവും ചേര്ന്നാണ് രണ്ടര കോടിയോളം രൂപ വില വരുന്ന ചന്ദനം പിടികൂടിയത്. ഒരു ടണ്ണിലധികം തൂക്കം വരുന്ന വന് ചന്ദനശേഖരമാണ് കലക്ടറുടെ നേതൃത്വത്തില് പിടികൂടിയതെന്നാണ് റിപ്പോര്ട്ട്.
പുലര്ച്ചെ നാലരയ്ക്കായിരുന്നു സംഭവം. സിമന്റ് കടത്തുന്ന ലോറിയില് സിമന്റാണെന്ന വ്യാജേനയാണ് ചന്ദനം കടത്താന് ഒരുങ്ങിയത്. ചന്ദനത്തിന് ഏകദേശം ഒരു ടണ്ണിലധികം ഭാരം വരുമെന്നാണ് പ്രാഥമിക നിഗമനം.
കലക്ടറുടെ ഗണ്മാനും ഡ്രൈവറും രാവിലെ ഉറക്കമുണര്ന്ന സമയത്ത് സമീപത്തെ വീട്ടില് നിന്ന് വല്ലാത്ത ശബ്ദം കേട്ടതിനെ തുടര്ന്ന് പോയി നോക്കിയതോടെയാണ് സംഭവം പുറത്തായത്. വീടിനു മുന്നില് നിര്ത്തിയിട്ട ലോറിയില് ചന്ദനം കയറ്റുകയായിരുന്നു. തുടര്ന്ന് പരിശോധിച്ചപ്പോഴാണ് പ്ലാസ്റ്റിക് ചാക്കുകളില് നിറച്ച അവസ്ഥയില് ചന്ദനത്തടികള് കണ്ടെത്തുന്നത്. സമീപത്തു തന്നെയാണ് കലക്ടറുടെയും ജില്ലാ പോലീസ് മേധാവിയുടെയും വീടുകള് സ്ഥിതി ചെയ്യുന്നത്.
വീട്ടില് നിന്ന് ചന്ദനം തൂക്കാനും മറ്റുമുള്ള ഉപകരണങ്ങളും കണ്ടെത്തിയിട്ടുണ്ട്. ചന്ദനം ഉടന് തന്നെ വനംവകുപ്പിന് കൈമാറും.