ബിനീഷ് കോടിയേരിയുടെ വീട്ടില്‍ നിന്നിറങ്ങാതെ ഇഡി; റെയ്ഡ് തുടരുന്നു
തിരുവനന്തപുരം : ബംഗളുരു മയക്കുമരുന്നു കേസുമായി ബന്ധപ്പെട്ട് അറസ്റ്റിലായ ബിനീഷ് കോടിയേരിയുടെ തിരുവനന്തപുരത്തെ വീട്ടില്‍ ബുധനാഴ്ച രാവിലെ പരിശോധനയ്ക്ക് എത്തിയ സംഘം വ്യാഴാഴ്ച രാവിലെയായിട്ടും മടങ്ങിയില്ല.
ബംഗളുരുവില്‍ നിന്നെത്തിയ എന്‍ഫോഴ്സ്മെന്‍റ് ഡയറക്ടറേറ്റിലെയും ആദായ നികുതി വകുപ്പിലെയും ഉദ്യോഗസ്ഥര്‍ അടങ്ങിയ എട്ടംഗ സംഘമാണ് തലസ്ഥാനത്തെ ആറിടങ്ങളില്‍ ബുധനാഴ്ച പരിശോധന നടത്തിയത്.
കര്‍ണാടക പോലീസും സിആര്‍പിഎഫ് ഉദ്യോഗസ്ഥരും റെയ്ഡിന് സുരക്ഷയൊരുക്കുന്നതിനായി എത്തിച്ചേര്‍ന്നിരുന്നു. ബംഗളുരു മയക്കുമരുന്നു കേസിലെ സാന്പത്തിക ഇടപാടുമായി ബന്ധപ്പെട്ട അന്വേഷണത്തിന്‍റെ ഭാഗമായാണ് പരിശോധന നടന്നത്.
തിരുവനന്തപുരം മരുതംകുഴി കൂട്ടാന്‍വിളയിലുള്ള ബിനീഷ് കോടിയേരിയുടെ വീട്, ടോറസ് റെമഡീസ് എന്ന സ്ഥാപനത്തിന്‍റെ ഉടമ അനന്ദ് പദ്മനാഭന്‍റെ കുടപ്പനക്കുന്നിലെ വീട്, കാര്‍ പാലസ് ഉടമ അബ്ദുള്‍ ലത്തീഫിന്‍റെ കവടിയാറിലെ വീട്, ബിനീഷിന്‍റെ സുഹൃത്ത് അബ്ദുള്‍ ജബ്ബാറിന്‍റെ നെടുമങ്ങാട്ടുള്ള വീട്, കേശവദാസപുരത്തെ കാര്‍ പാലസ്, കെ.കെ റോക്സ് ഉടമ അരുണ്‍ വര്‍ഗീസിന്‍റെ പട്ടത്തെ ഓഫീസ് എന്നിവിടങ്ങളിലാണ് അന്വേഷണസംഘം ഒരേ സമയം പരിശോധനയ്ക്കെത്തിയത്.
രാവിലെ ഒന്‍പതരയോടെയാണ് അന്വേഷണ സംഘം മരുതംകുഴിയിലുള്ള ബിനീഷ് കോടിയേരിയുടെ 'കോടിയേരി' എന്നു പേരിട്ടിട്ടുള്ള വീട്ടിലേക്കെത്തിയത് . എന്നാല്‍, വീട് അടഞ്ഞുകിടക്കുകയായിരുന്നു. തുടര്‍ന്ന് ഉദ്യോഗസ്ഥര്‍ ഫോണില്‍ ബിനീഷിന്‍റെ കുടുംബാംഗങ്ങളുമായി ബന്ധപ്പെട്ടതിനു പിന്നാലെ മുക്കാല്‍ മണിക്കൂറിനു ശേഷം ബിനീഷിന്‍റെ ഭാര്യയും ബന്ധുക്കളും എത്തി വീട് തുറന്നു നല്‍കി.
15 സെന്‍റില്‍ സ്ഥിതി ചെയ്യുന്ന കോടികള്‍ വിലമതിക്കുന്ന ഈ വീട് ബിനീഷ് കോടിയേരിയുടെ പേരിലുള്ളതാണ്. സിപിഎം സംസ്ഥാന സെക്രട്ടറി കോടിയേരി ബാലകൃഷ്ണനും ഭാര്യയും നേരത്തേ ഇവിടെയാണ് താമസിച്ചിരുന്നത്.
Related News
ബിനീഷ് കോടിയേരിയുടെ ജാമ്യാപേക്ഷയില് വാദം മാറ്റി
"അക്കൗണ്ടില് പണം വന്നത് പച്ചക്കറി വ്യാപാരം നടത്തി'; ജാമ്യത്തിനായി വാദിച്ച് ബിനീഷ്
കളളപ്പണം വെളുപ്പിക്കല് കേസ്; ബിനീഷ് കോടിയേരിയുടെ ജാമ്യാപേക്ഷ തളളി
ബിനീഷ് കോടിയേരിയെ എന്.സി.ബി കസ്റ്റഡിയിലെടുത്തു