നടന്‍ വിജയ്‌യുടെ അച്ഛന്‍ ബിജെപിയിലേക്കെന്ന പ്രചാരണം ശക്തം; നിലപാട് വ്യക്തമാക്കി എസ്.എ. ചന്ദ്രശേഖര്‍

Ajith.A

14 October 2020 07:25 PM

ചെന്നൈ: താന്‍ ബിജെപി.യില്‍ ചേരുന്നു എന്ന പ്രചാരണം അടിസ്ഥാന രഹിതമെന്ന് നടന്‍ വിജയ്‌യുടെ അച്ഛന്‍ എസ്.എ. ചന്ദ്രശേഖര്‍. സംവിധായകനും നിര്‍മ്മാതാവുമായ ചന്ദ്രശേഖര്‍ ബിജെപി.യില്‍ ചേരുമെന്ന പ്രചാരണം സജീവമായതിനെത്തുടര്‍ന്നാണ് അദ്ദേഹം പ്രതികരിച്ചത്. പലരും ഇക്കാര്യം തന്നോട് ചോദിക്കുന്നുണ്ടെന്ന് പറഞ്ഞ ചന്ദ്രശേഖര്‍ അടിസ്ഥാനരഹിതമായ പ്രചാരണമാണ് നടക്കുന്നതെന്ന് വ്യക്തമാക്കി.

മുമ്ബ് പല തവണ വിജയ് രാഷ്ട്രീയത്തില്‍ ഇറങ്ങുമെന്ന സൂചന നല്‍കിയിട്ടുള്ള ചന്ദ്രശേഖര്‍ താന്‍ രാഷ്ട്രീയ രംഗത്തെത്തുന്നതിനെക്കുറിച്ച്‌ ഒന്നും പറഞ്ഞിരുന്നില്ല. 2017-ല്‍ 'മെര്‍സല്‍' എന്ന വിജയ് ചിത്രത്തില്‍ കേന്ദ്രസര്‍ക്കാരിനെ എതിര്‍ക്കുന്ന സംഭാഷണമുണ്ടെന്ന പേരില്‍ ബിജെപി. പ്രതിഷേധവുമായി രംഗത്തെത്തിയിരുന്നു. മുമ്ബ് കോണ്‍ഗ്രസുമായി അടുപ്പം പുലര്‍ത്തിയിരുന്ന വിജയ് ഇപ്പോള്‍ ഒരു പാര്‍ട്ടിയോടും ആഭിമുഖ്യം പ്രകടിപ്പിക്കാറില്ലെങ്കിലും സമയമാകുമ്ബോള്‍ രാഷ്ട്രീയത്തിലേക്കു വരുമെന്ന തരത്തില്‍ പ്രതികരിച്ചിട്ടുണ്ട്.

താന്‍ ഒരു കിസ്ത്യാനിയാണെന്നും തന്റെ ഭാര്യ ശോഭ ഹിന്ദുവാണെന്നും ചന്ദ്രശേഖര്‍ നേരത്തേ ഒരു അഭിമുഖത്തില്‍ വ്യക്തമാക്കിയിരുന്നു. പക്ഷേ മതപരമായ വിഷയത്തില്‍ ഞങ്ങള്‍ പരസ്പരം ഇടപെടാറില്ലെന്ന് അദ്ദേഹം പറഞ്ഞു. ഞാന്‍ ജീവിതത്തില്‍ ഒരുവട്ടം ഞാന്‍ ജറുസലേമില്‍ പോയിട്ടുണ്ട്, മൂന്ന് വട്ടം തിരുപ്പതിയിലും. തിരുപ്പതിയില്‍ പോയി തലമൊട്ടയടിച്ചിട്ടുണ്ട്. വിജയ് വിവാഹം കഴിച്ചത് ഒരു ഹിന്ദു പെണ്‍കുട്ടിയെയാണ്. വിജയ്യുടെ വിവാഹം ക്രിസ്ത്യന്‍ മതാചാര പ്രകാരമാണ് നടത്തിയതെന്ന് ആരോപിക്കുന്നവര്‍ തെളിവ് കൊണ്ടുവരട്ടെയെന്നും തെറ്റാണെന്ന് തെളിഞ്ഞാല്‍ ആരോപണം ഉന്നയിച്ചവര്‍ പരസ്യമായി മാപ്പ് പറയുമോ എന്നും ചന്ദ്രശേഖര്‍ ചോദിച്ചിരുന്നു.

വിജയ് രാഷ്ട്രീയപ്രവേശം നടത്തുന്നതിനായി താനും കാത്തിരിക്കുകയാണെന്ന് ചന്ദ്രശേഖര്‍ നേരത്തേ വ്യക്തമാക്കിയിരുന്നു. മക്കള്‍ ആഗ്രഹിക്കുന്നത് നിറവേറ്റുക എന്നുള്ളതാണ് ഒരു അച്ഛന്റെ കടമ. എല്ലാ അച്ഛന്മാരും ആ കടമ നിറവേറ്റും. അതുപോലെ മകന്‍ രാഷ്ട്രീയത്തിലേക്ക് വരണമെന്ന് ആഗ്രഹിച്ചാല്‍ ഞാന്‍ അത് നിറവേറ്റും. ഒരു നാള്‍ അത് സംഭവിക്കുമെന്നാണ് കരുതുന്നതെന്നും അദ്ദേഹം പറഞ്ഞു. രജനികാന്തിനെയും കമല്‍ഹാസനെയും പിന്തുണച്ചതില്‍ ഇപ്പോള്‍ ദുഃഖിക്കുന്നു. അവര്‍ രാഷ്ട്രീയത്തില്‍ വന്നാല്‍ തമിഴ്‌നാടിന് നല്ലത് വരുമെന്ന് കരുതിയിരുന്നു. എന്നാല്‍ രജനികാന്ത് തമിഴരെ പറ്റിക്കുന്നുവെന്നാണ് ഇപ്പോള്‍ തോന്നുന്നത്. തൂത്തുക്കുടിയില്‍ വെടിയേറ്റ് മരിച്ചവരെ രജനി തീവ്രവാദികളോട് ഉപമിച്ചു. തമിഴര്‍ വേണ്ടെന്ന് പറയുന്ന സിഎഎയെ രജനി അനുകൂലിക്കുകയാണെന്നും ചന്ദ്രശേഖര്‍ ആരോപിച്ചു.