കേരള ശാസ്ത്ര സാഹിത്യ അവാർഡുകൾ (2021) പ്രഖ്യാപിച്ചു
സംസ്ഥാന ശാസ്ത്ര സാങ്കേതിക പരിസ്ഥിതി കൗൺസിൽ ഏർപ്പെടുത്തിയ 2021-ലെ കേരള ശാസ്ത്ര സാഹിത്യ അവാർഡുകൾ പ്രഖ്യാപിച്ചു. മലയാള സാഹിത്യത്തിലൂടെ ശാസ്ത്രവിഷയങ്ങളെ
ജനകീയവല്ക്കരിക്കുന്നതില് ഗണ്യമായ സംഭാവനകൾ നല്കിയിട്ടുള്ള വ്യക്തികള്ക്കാണ് പ്രസ്തുത പുരസ്കാരം നല്കുന്നത്. ബാല ശാസ്ത്ര സാഹിത്യം, ജനപ്രിയ ശാസ്ത്ര സാഹിത്യം, ശാസ്ത്ര പത്ര പ്രവർത്തനം,
ഗഹനമായ വൈജ്ഞാനിക ശാസ്ത്ര സാഹിത്യം എന്നീ വിഭാഗങ്ങളിലെ കൃതികളാണ് അവാർഡിന് അർഹമായത്. 50,000 രൂപയും ഫലകവും പ്രശസ്തി പത്രവുമടങ്ങുന്നതാണ് പുരസ്കാരം. ബാല ശാസ്ത്ര സാഹിത്യത്തിനുള്ള 2021-ലെ പുരസ്കാരം ഡോ. മുഹമ്മദ് ജാഫർ പാലോട്ടും ശ്രീ. ജനുവും ചേർന്ന് രചിച്ച കൊറോണക്കാലത്ത് ഒരു വവ്വാൽ എന്ന കൃതിക്കാണ്. കണ്ണൂർ സ്വദേശിയായ ഡോ. മുഹമ്മദ് ജാഫർ പാലോട്ട് സുവോളജിക്കൽ സർവേ ഓഫ് ഇന്ത്യയുടെ വെസ്റ്റേൺ റീജിയണൽ സെന്ററിൽ സയന്റിസ്റ്റായി
സേവനമനുഷ്ഠിക്കുകയാണ്. അറിയപ്പെടുന്ന പരിസ്ഥിതി പ്രവർത്തകനും മലബാർ നാച്വറൽ ഹിസ്റ്ററി സൊസൈറ്റിയുടെ സ്ഥാപക സെക്രട്ടറിയുമാണ്. കണ്ണൂർ കോളയാട് സ്വദേശിയായ ശ്രീ.ജനു യുറീക്ക മാസികയുടെ മുൻ എഡിറ്ററായിരുന്നു. നിലവിൽ ശാസ്ത്ര സാഹിത്യ പരിഷത്തിലെ
അംഗമാണ്. ജനപ്രിയ ശാസ്ത്ര സാഹിത്യത്തിനുള്ള 2021-ലെ പുരസ്കാരത്തിന് രണ്ട് പുസ്തകങ്ങളാണ് അർഹമായത്. ഡോ. എം. എസ്. വല്യത്താനും ശ്രീ. വി. ഡി. സെൽവരാജും ചേർന്ന് രചിച്ച “മയൂരശിഖ ജീവിതം അനുഭവം അറിവ്” എന്ന പുസ്തകവും, ഡോ. വി. രാമൻകുട്ടിയുടെ
“എപ്പിഡെമിയോളജി രോഗവ്യാപനത്തിന്റെ ശാസ്ത്രം” എന്ന പുസ്തകവുമാണ് തിരഞ്ഞെടുത്തത്.
ഡോ.വല്യത്താൻ ശ്രീചിത്ര തിരുനാൾ ഇൻസ്റ്റിറ്റ്യൂട്ട് ഫോർ മെഡിക്കൽ സയൻസസ് ആൻഡ് ടെക്നോളജിയുടെ (SCTIMST) സ്ഥാപക ഡയറക്ടറും കെ.എസ്.സി.എസ്.ടി.ഇ യുടെ ആദ്യ എക്സിക്യൂട്ടീവ് വൈസ് പ്രസിഡന്റും അറിയപ്പെടുന്ന ഇന്ത്യൻ ഹൃദ്രോഗ വിദഗ്ദ്ധനുമാണ്. ഇപ്പോൾ മണിപ്പാൽ സ്കൂൾ ഓഫ് ലൈഫ് സയൻസസിലെ നാഷണൽ റിസർച്ച് പ്രൊഫസറാണ്. ആലപ്പുഴ മാവേലിക്കര സ്വദേശിയാണ്
ഇദ്ദേഹം. കലാകൗമുദി വാരികയിൽ ഡെപ്യൂട്ടി എഡിറ്ററായി ജോലി ചെയ്യുന്ന ശ്രീ.വി.ഡി. ശെൽവരാജ് പത്തനംതിട്ട സ്വദേശിയാണ്. ഡോ. വി. രാമൻകുട്ടി അച്യുതമേനോൻ സെന്റർ ഫോർ ഹെൽത്ത്
സയൻസ് സ്റ്റഡീസിൽ നിന്നും സീനിയർ പ്രൊഫസറായി വിരമിച്ചു. അദ്ദേഹം പ്രഗത്ഭനായ ആരോഗ്യ സാമ്പത്തിക വിദഗ്ദ്ധനും, സാംക്രമികരോഗശാസ്ത്ര വിദഗ്ദ്ധനുമാണ് . തൃശൂർ സ്വദേശിയായ
ഇദ്ദേഹം നിലവിൽ തൃശൂർ അമല കാൻസർ റിസർച്ച് സെന്ററിൽ
റിസർച്ച് ഡയറക്ടറാണ്. ഗഹനമായ വൈജ്ഞാനിക ശാസ്ത്ര സാഹിത്യത്തിനുള്ള 2021-ലെ
പുരസ്കാരത്തിന് അർഹത നേടിയത് ഡോ. സുധികുമാർ എ. വി. യുടെ “കേരളത്തിലെ ചിലന്തികൾ” എന്ന പുസ്തകമാണ് . ഇദ്ദേഹം ഇരിഞ്ഞാലക്കുട ക്രൈസ്റ്റ് കോളേജിലെ ജന്തുശാസ്ത്ര വിഭാഗത്തിലെ
അസിസ്റ്റന്റ് പ്രൊഫസർ ആണ്. എറണാകുളം വരാപ്പുഴ സ്വദേശിയാണ്. ശാസ്ത്ര പത്ര പ്രവര്ത്തനത്തിനുള്ള 2021-ലെ പുരസ്കാരത്തിന് മംഗളം ഡെയിലിയിലെ മുൻ ചീഫ് റിപ്പോർട്ടർ ശ്രീ. എം. ജയതിലകൻ
അർഹനായി. മംഗളം ദിനപത്രത്തിൽ പ്രസിദ്ധീകരിച്ച “ജലാശയങ്ങൾ വിഴുങ്ങുന്ന ദുർഭൂതം”എന്ന ലേഖനമാണ് ഇദ്ദേഹത്തെ അവാർഡിന് അർഹനാക്കിയത്. കോഴിക്കോട് കിനാലൂർ സ്വദേശിയാണ് ഇദ്ദേഹം.