ആസാദി കാ അമൃത് മഹോത്സവ് : തെക്കുംകര പഞ്ചായത്ത്‌ തല ഉദ്ഘാടനം നടന്നു

News Desk

04 October 2021 01:30 AM

തെക്കുംകര ഗ്രാമപഞ്ചായത്ത്‌ ആസാദി കാ അമൃത് മഹോത്സവ് പഞ്ചായത്ത്‌ തല ഉദ്ഘാടനവും ഔഷധാമൃതം പദ്ധതിയുടെ ധാരണാപത്ര കൈമാറ്റവും  സേവ്യർ ചിറ്റിലപ്പിള്ളി എം എൽ എ നിർവ്വഹിച്ചു. തെക്കുംകര ഗ്രാമപഞ്ചായത്ത്‌ പ്രസിഡന്റ്‌ സുനിൽകുമാർ അധ്യക്ഷനായിരുന്നു.

ശാസ്ത്രീയമായ ഖര ദ്രാവക മാലിന്യ സംസ്‌ക്കരണം ഉറപ്പ് വരുത്തുക, ശുചിത്വം, വെളിയിട വിസർജ്ജ്യ മുക്തഗ്രാമം എന്നീ നേട്ടങ്ങൾ നിലനിർത്തുക, തെക്കുംകര വില്ലേജ് ഓഡിഎഫ് പ്ലസ് ആയി പ്രഖ്യാപിക്കുക എന്നിവയും പരിപാടിയുടെ ഭാഗമായി നടന്നു.

“തുറന്ന മലമൂത്ര വിസർജ്ജന രഹിതപദവി നിലനിർത്തുന്നതും ഖര, ദ്രാവക മാലിന്യ സംസ്കരണം ഉറപ്പുവരുത്തുന്നതുമായ ഗ്രാമങ്ങൾക്കാണ് ഓഡിഎഫ് പ്ലസ് അംഗീകാരം ലഭിക്കുക. ഒരു ഗ്രാമത്തിലെ മുഴുവൻ വീടുകൾ, പ്രൈമറി സ്കൂൾ, പഞ്ചായത്ത്, അങ്കണവാടി കേന്ദ്രം എന്നിവയ്ക്ക് ഒരു ടോയ്‌ലറ്റ് ലഭ്യമാണെന്ന് ഉറപ്പുവരുത്തുന്നതും ഇതിൽ ഉൾപ്പെടുന്നു . ഓഡിഎഫ് പ്ലസ് ആയി പ്രഖ്യപിക്കുന്നതിന്റെ ഭാഗമായി കമ്പോസ്റ്റ് പിറ്റും സോക്ക് പിറ്റും ആയിരം കുടുംബങ്ങൾക്ക് ബയോപിന്നും നിർമിച്ചു നൽകുന്നുണ്ട്.

പഞ്ചായത്തിലെ സാധ്യമായ സ്ഥലങ്ങളിൽ എല്ലാം ഔഷധ സസ്യങ്ങൾ കൃഷി ചെയ്യുന്ന പദ്ധതിയാണ് ഔഷധാമൃതം.

സംസ്ഥാനത്ത് ഔഷധ സസ്യ കൃഷിക്കും അതിൽ നിന്നുള്ള ഉൽപന്ന നിർമാണങ്ങൾക്കും നേതൃത്വം നൽകുന്ന മറ്റത്തൂർ ലേബർ കോൺട്രാക്ട് സൊസൈറ്റിയുമായി ചേർന്ന് പ്രവർത്തിക്കുന്നതിന്റെ ധാരണാപത്രവും ചടങ്ങിൽ കൈമാറി. വടക്കാഞ്ചേരി ബ്ലോക്ക് വൈസ് പ്രസിഡന്റ്‌ സി വി സുനിൽകുമാർ,

വടക്കാഞ്ചേരി ബ്ലോക്ക് വികസനകാര്യ സ്റ്റാന്റിംഗ് കമ്മിറ്റി ചെയർപേഴ്സൺ എം കെ ശ്രീജ,തെക്കുംകര പഞ്ചായത്ത്‌ വികസനകാര്യ സ്റ്റാന്റിംഗ് കമ്മിറ്റി ചെയർമാൻ പി ആർ രാധാകൃഷ്ണൻ, മറ്റ് ജനപ്രതിനിധികൾ, ഉദ്യോഗസ്ഥർ എന്നിവർ ചടങ്ങിൽ പങ്കെടുത്തു.