News

രാജ്യാന്തര ആദിവാസി ദിനാചരണം സംഘടിപ്പിച്ചു

News Desk

09 August 2021 10:45 PM

പട്ടികജാതി – പട്ടികവർഗ്ഗ ക്ഷേമ വകുപ്പിന്റെ നേതൃത്വത്തിൽ സംഘടിപ്പിക്കുന്ന രാജ്യാന്തര ആദിവാസി ദിനാചരണത്തിന്റെ ഭാഗമായി അട്ടപ്പാടി മേഖലയിൽ ആദിവാസി ദിനാചരണം ആചരിച്ചു. “ആദിവാസി ജനത ആരോഗ്യ ജനത” എന്ന പ്രതിജ്ഞ ചൊല്ലി ഊരു മൂപ്പന്മാർ ഊരുകളിൽ ദിനാചരണം ഉദ്ഘാടനം ചെയ്തു. ഓഗസ്റ്റ് 15 വരെയാണ് ‘ഗോത്രാരോഗ്യവാരം’ എന്ന പേരിൽ പരിപാടികൾ സംഘടിപ്പിക്കുന്നത്.

രാജ്യാന്തര ആദിവാസി ദിനാചരണത്തിന്റെ സംസ്ഥാനതല ഉദ്ഘാടനം മുഖ്യമന്ത്രി പിണറായി വിജയൻ ഓൺലൈനായി നിർവഹിച്ചു. പട്ടികജാതി – പട്ടികവർഗ്ഗ – പിന്നാക്കവികസന – ദേവസ്വം – പാർലിമെന്ററികാര്യ വകുപ്പ് മന്ത്രി കെ. രാധാകൃഷ്ണൻ അധ്യക്ഷനായി. തദ്ദേശ സ്വയം ഭരണസ്ഥാപനങ്ങൾ, വനം, എക്സൈസ്, പോലീസ്, ആരോഗ്യം വകുപ്പുകളുടെ സഹകരണത്തോടെ പട്ടികവർഗ്ഗ വികസന വകുപ്പിലെ വിവിധ പദ്ധതികൾ, അവകാശങ്ങൾ, ശുചിത്വം എന്നിവയെ കുറിച്ച് അവബോധം, മദ്യം, മയക്കുമരുന്നുകൾ എന്നിവയ്ക്കെതിരെ ബോധവത്കരണവും നടന്നു.

ദിനാചരണത്തോടനുബന്ധിച്ച് വരും ദിവസങ്ങളിൽ ഊരുകളിൽ ആരോഗ്യ സംരക്ഷണം, ലഹരി വിരുദ്ധ ബോധവത്ക്കരണ പരിപാടികൾ , കോവിഡ് ബോധവത്ക്കരണം, വിദ്യാഭ്യാസ പ്രചരണം, അവകാശ സംരക്ഷണം തുടങ്ങി വിവിധ പരിപാടികൾ സംഘടിപ്പിക്കും.

അട്ടപ്പാടിയിലെ 192 ഊരുകളിലായി നടന്ന പരിപാടിയിൽ ഗ്രാമ- ബ്ലോക്ക് പഞ്ചായത്ത് പ്രതിനിധികൾ , ഉദ്യോഗസ്ഥർ , ഊരുനിവാസികൾ എന്നിവർ പങ്കെടുത്തു.

Related News