വടക്കഞ്ചേരി ബസ് അപകടം; മരിച്ചവരുടെ കുടുംബത്തിനും പരിക്കേറ്റവര്ക്കും ധനസഹായം പ്രഖ്യാപിച്ച് പ്രധാനമന്ത്രി
ഡല്ഹി: ഒന്പത് പേരുടെ മരണത്തിനിടയാക്കിയ വടക്കഞ്ചേരി ബസ് അപകടത്തില് ദുഃഖം രേഖപ്പെടുത്തി പ്രധാനമന്ത്രി നരേന്ദ്രമോദി.
മരിച്ചവരുടെ കുടുംബത്തിനും പരിക്കേറ്റവര്ക്കും ധനസഹായവും പ്രധാനമന്ത്രി പ്രഖ്യാപിച്ചു. കേരളത്തിലെ പാലക്കാട് ജില്ലയിലുണ്ടായ അപകടത്തില് ജീവന് നഷ്ടപ്പെട്ട സംഭവത്തില് ദുഃഖം രേഖപ്പെടുത്തുന്നു. മരിച്ചവരുടെ കുടുംബങ്ങളെ അനുശോചനം അറിയിക്കുകയും പരിക്കേറ്റവര് വേഗം സുഖം പ്രാപിക്കാന് പ്രാര്ത്ഥിക്കുകയും ചെയ്യുന്നു. മരിച്ചവരുടെ കുടുംബത്തിന് പ്രധാനമന്ത്രി ദേശീയ ദുരിതാശ്വാസ നിധിയില്(PMNRF) നിന്നും 2 ലക്ഷവും പരിക്കേറ്റവര്ക്ക് 50,000 രൂപയും ധനസഹായം നല്കുമെന്ന് പ്രധാനമന്ത്രിയുടെ ഓഫീസ് അറിയിച്ചു.
വടക്കഞ്ചേരിയില് ടൂറിസ്റ്റ് ബസ് ഇടിച്ചു മറിഞ്ഞുണ്ടായ അപകടം ആരെയും ഞെട്ടിക്കുന്നതാണെന്ന് മുഖ്യമന്ത്രി പിണറായി വിജയനും പ്രതികരിച്ചിരുന്നു. അപകടത്തിന്റെ കാരണം അന്വേഷിക്കുമെന്നും റോഡിലെ നിയമ ലംഘനങ്ങള്ക്ക് എതിരെ കര്ശന നടപടി സ്വീകരിക്കുമെന്നുമാണ് മുഖ്യമന്ത്രി വ്യക്തമാക്കിയത്. പരിക്കേറ്റവര്ക്ക് ആവശ്യമായ ചികിത്സാ സഹായം ചെയ്യാന് സര്ക്കാര് സംവിധാനങ്ങള് ഉണര്ന്ന് പ്രവര്ത്തിക്കുന്നുണ്ടെന്നും അദ്ദേഹം പറഞ്ഞു.