കേരളത്തിലും 100 കടന്ന് പ്രീമിയം പെട്രൊള്‍ വില

Ajith.A

07 June 2021 11:00 AM

ഇന്ധനവില വര്‍ധന തുടരുന്നതിനിടെ സംസ്ഥാനത്തും പെട്രൊളിന് ആദ്യമായി 100 രൂപ കടന്നു. പ്രീമിയം പെട്രൊളിനാണ് പല ജില്ലകളിലും വില വര്‍ധിച്ച്‌ ആദ്യമായി സെഞ്ചുറി കടന്നത്. 100.20 രൂപയാണ് ഒരു ലിറ്റര്‍ പ്രീമിയം പെട്രോളിന് തിരുവനന്തപുരത്ത് വില. വയനാട്ടില്‍ ബത്തേരി, പാലക്കാട്, ഇടുക്കിയില്‍ കട്ടപ്പന, അണക്കര എന്നിവിടങ്ങളിലും പ്രീമിയം പെട്രൊളിന് 100 രൂപയിലേറെയായി ഉയര്‍ന്നു. വയനാട് ബത്തേരിയില്‍ 100.24 രൂപയും അടിമാലിയില്‍ 100.40 രൂപയും അണക്കരയില്‍ 101 രൂപ മൂന്ന് പൈസയുമാണ് എക്സ്ട്രാ പ്രീമിയം പെട്രൊളിന്റെ വില.

അതേസമയം സാധാരണ പെട്രോളിനും ഡീസലിനും 28 പൈസ വീതമാണ് ഇന്ന് കൂട്ടിയത്. ഇതോടെ കൊച്ചിയില്‍ പെട്രോളിന് 95.43 രൂപയും ഡീസലിന് 91.88 രൂപയുമായി. കോഴിക്കോട്ട് പെട്രോള്‍ ലിറ്ററിന് 95.68 രൂപയും ഡീസലിന് 91.03 രൂപയുമാണ്. തിരുവനന്തപുരത്ത് പെട്രോളിന് 97.38 രൂപയും ഡീസലിന് 92. 31 രൂപയുമാണ്. സംസ്ഥാന തിരഞ്ഞെടുപ്പ് നടന്ന സമയത്ത് പെട്രൊളിന്റെ വില വര്‍ധന ഉണ്ടായിരുന്നില്ല. ഇതിന് ശേഷം കഴിഞ്ഞ 37 ദിവസത്തിനിടെ 21 തവണയാണ് ഇന്ധനവില വര്‍ധിപ്പിച്ചത്.