നട്ടെല്ലിന്റെ സ്ഥാനത്ത് വാഴപ്പിണ്ടിയല്ലാത്ത കോൺഗ്രസ്സ്, ലീഗ് പ്രവർത്തകർ ചോദ്യം ചെയ്യണം: മുഹമദ് റിയാസ്
സംസ്ഥാനത്തെ വിവിധയിടങ്ങളിൽ എസ്ഡിപിഐ ആക്രമണത്തിൽ കൊല്ലപ്പെട്ട കോൺഗ്രസ്സ്, മുസ്ലീം ലീഗ് പ്രവർത്തകരുടെ കുടുംബാംഗങ്ങളുടെയും സഹപ്രവർത്തകരുടെയും ദുഃഖത്തിൽ പങ്കുചേരുന്നുവെന്ന് ഡിവൈഎഫ്ഐ അഖിലേന്ത്യ പ്രസിഡന്റ് മുഹമ്മദ് റിയാസ്. ചാവക്കാട് പുന്നയില് വെട്ടേറ്റ കോൺഗ്രസ് പ്രവർത്തകൻ നൗഷാദ് (43) ഇന്ന് രാവിലെയാണ് മരിച്ചത്.
സംഭവത്തിൽ ഗുരുവായൂർ ബ്ലോക്ക് കമ്മിറ്റി തന്നെ എസ്ഡിപിഐ ആണ് പിന്നിൽ എന്ന് പറഞ്ഞിട്ടും കെപിസിസി അധ്യക്ഷൻ മുല്ലപ്പള്ളി രാമചന്ദ്രനും ടി എൻ പ്രതാപനും അടക്കമുള്ള നേതാക്കൾ ഇതുവരെ സമ്മതിക്കാൻ കൂട്ടാക്കിയിട്ടില്ല. ഇത് കോൺഗ്രസ് പ്രവർത്തകർക്കിടയിൽത്തന്നെ പ്രതിഷേധത്തിന് കാരണമായിട്ടുണ്ട്.
എസ്ഡിപിഐ എന്ന നാലക്ഷരമുള്ള ആസിഡിനെക്കുറിച്ച്, ഈ കൊലപാതകവുമായി ബന്ധപ്പെട്ട് കോൺഗ്രസ്സ്, മുസ്ലീം ലീഗ് നേതൃത്വം പ്രതികരിക്കാത്തതിനെതിരെ, നട്ടെല്ലിന്റെ സ്ഥാനത്ത് വാഴപ്പിണ്ടിയല്ലാത്ത കോൺഗ്രസ്സ്, മുസ്ലീം ലീഗ് പ്രവർത്തകർ ചോദ്യം ചെയ്യുമെന്ന് പ്രതീക്ഷിക്കുന്നു ‐ മുഹമ്മദ് റിയാസ് ഫേസ്ബുക്കിൽ കുറിച്ചു.