ശ്രീനിവാസനെതിരെയുള്ള കുറിപ്പ് ശ്രദ്ധേയമാകുന്നു
ശ്രീനിവാസൻറെ വിവാദ പരമാർശത്തിൽ മറുപടിയായ ശ്യം രാജിന്റെ കുറിപ്പ് വൈറൽ ആകുന്നു.
താങ്കളെന്ന കലാകാരനെ എന്നും എക്കാലത്തും ആദരിക്കുന്നു അംഗീകരിക്കുന്നു.. ഇനിയും അത് അങ്ങനെ തന്നെ. ഇത് എഴുതുന്നത് അംഗൻവാടിയിൽ പഠിച്ചിട്ടുള്ള ഒരു കുട്ടി മാത്രമല്ല . അങ്കണവാടികളിൽ ഇപ്പോഴും കുട്ടികളെ പഠിപ്പിക്കുന്ന ഒരു അധ്യാപികയുടെ മകൻ കൂടിയാണ്.
ഈ അങ്കണവാടിയെ അങ്ങ് ചെറുതാക്കി കളയല്ലേ സാറെ... ഇന്ന് ഉന്നതിയിൽ നിൽക്കുന്ന ഏതൊരു വ്യക്തിയുടെയും ആദ്യ പാഠങ്ങൾ പഠിപ്പിച്ചു തന്നത് ഇതേ ടീച്ചർമാർ തന്നെയാണ്...
ഇന്നും എവിടെവച്ച് കണ്ടാലും ഓടിച്ചെന്ന് സ്നേഹത്തോടെ "ടീച്ചറെ" എന്ന് വിളിക്കുന്നതും മനസ്സിലാ നന്മയുള്ളതുകൊണ്ടുമാത്രമാണ്.പലപ്പോഴും അമ്മയോടൊപ്പം പോകുമ്പോൾ അത് നേരിട്ട് കണ്ടിട്ടും ഉണ്ട്.. എല്ലാവരും ഒന്നുമറിയാത്ത പ്രായത്തിൽ ഒരുപാട് മൂത്രവും മലവും അവിടെ ഒഴിച്ചു കളഞ്ഞിട്ടുണ്ട്. ഒരു ശങ്കയും ഇല്ലാതെ അവരത് വൃത്തിയാക്കി തന്നിട്ടുമുണ്ട്.
പിന്നെ താങ്കൾ പറഞ്ഞ കാര്യം തിരുത്തി പറയാൻ കൂടെ ആഗ്രഹിക്കുന്നു.. കൃത്യമായ മാർഗ നിർദ്ദേശം icds പോലുള്ള ഉന്നത ഡിപ്പാർട്മെന്റുകളിൽ നിന്ന് വർഷാവർഷം കുട്ടികളെ എന്ത് പഠിപ്പിക്കണം അവരുടെ ബുദ്ധിവളർച്ച തുടങ്ങിയ കാര്യങ്ങളെപറ്റി വിവരം(ഡോക്ടറേറ്റ് ഉള്ളവർ) ഉള്ളവർ ട്രെയിനിങ് കൊടുത്തതിനു ശേഷമാണു അവർ കുട്ടികളെ പഠിപ്പിക്കുന്നത്. പിന്നെ മറ്റു ചില വസ്തുതകളിലേക്ക്..
നമ്മളൊക്കെ ചെയ്യുന്നതിന് എത്രയോ ഇരട്ടി ജോലിയാണ് തുച്ഛമായ ഓണറേറിയം കൈപ്പറ്റുന്ന അംഗൻവാടി ടീച്ചർമാർ ചെയ്യുന്നത് എന്നറിയാമോ??
1. ഗർഭകാലം മുതൽ വയോവൃദ്ധൻ മാരുടെ കണക്കുവരെ അംഗൻവാടി ടീച്ചർമാരുടെ കൈ വശത്തു നിന്നാണ് ഗവൺമെൻറുകൾ വാങ്ങുന്നത്.
2. ഗർഭിണിയായിരിക്കുമ്പോൾ പോഷകാഹാരം കൊടുക്കുന്നതും, അതാത് സമയത്ത് പലവിധ വിവരങ്ങൾ അറിയിക്കുന്നതും ഇവരാണ്.
3. കുട്ടിയുടെ ജനനം മുതൽ, കുട്ടിയുടെ വെയിറ്റ് കുറഞ്ഞാൽ ദിവസേന ചെന്ന വെയിറ്റ് എടുത്ത് അതിനുള്ള പരിഹാരമാർഗ്ഗങ്ങൾ നൽകുന്നതും ഇവരാണ്
4. കുട്ടിക്ക് എന്തെങ്കിലും അംഗവൈകല്യങ്ങൾ ഉണ്ടെങ്കിൽ അത് തിരിച്ചറിഞ്ഞ്, പോരായ്മകൾ തിരുത്തുവാൻ സഹായിക്കുന്നതും ഇവരാണ്
5. ഓരോ അംഗൻവാടി പരിസരത്തെയും കൗമാരക്കാരായ കുട്ടികളുടെ എണ്ണം, അംഗവൈകല്യമുള്ള കുട്ടികളുടെ എണ്ണം, മാനസിക വൈകല്യമുള്ള കുട്ടികളുടെ എണ്ണം, 60 വയസ്സിന് മുകളിലുള്ളവരുടെ എണ്ണം, ജാതി തിരിച്ചുള്ള കണക്കുകൾ, കിണർ ഉണ്ടോ, കുളിമുറി ഉണ്ടോ, കക്കൂസ് ഉണ്ടോ, അടുക്കള ഉണ്ടോ, ഓടിട്ട വീട് ആണോ, ടെറസ് വീട് ആണോ, അതോ ഓലമേഞ്ഞ ആണോ ഇതെല്ലാം അതാത് സർക്കാരിന് നൽകുന്നതും ഇവരാണ്.
6. കുട്ടികൾക്കും പ്രായമായവർക്കും പോഷകാഹാരങ്ങൾ അംഗനവാടി മുഖേനയാണ് നൽകുന്നത്.
7. താഴെ തട്ടിലുള്ള എല്ലാ ഡേറ്റ വിവരങ്ങളും അംഗൻവാടി ടീച്ചർമാർ ഇല്ല എങ്കിൽ നിസ്സംശയം നടക്കില്ല എന്ന് തന്നെ പറയാം.
8. അതായത് അത് വികസിച്ചു കൊണ്ടിരിക്കുന്ന നമ്മുടെ ഈ രാജ്യത്ത്, അംഗൻവാടി ടീച്ചർമാരുടെ പങ്ക് വളരെ വലുതാണ്. നമ്മുടെ കുട്ടികൾക്കുള്ള (നാളത്തെ പൗരന്മാരുടെ) ഓരോ മാസത്തെ കണക്കുകളും മറ്റും അവരുടെ കൈവശം ഉണ്ട്. അവർ തന്നെയാണ് നമ്മളെ നമ്മൾ ആക്കി മാറ്റിയത് എന്ന് തന്നെ പറയാം. ശ്രീനിവാസൻ അടച്ചാക്ഷേപിക്കുന്നത് നമ്മളെ നമ്മൾ ആക്കിയവരെയാണ്.
പ്രതികരിക്കാതിരിക്കാൻ കഴിയില്ല. പ്രതികരിച്ചു പോകും... കാരണം ഉച്ചക്കുള്ള പയറു കഞ്ഞിയും വൈകുന്നേരതെ ഉപ്പുമാവും ഒരുപാട് അവരുടെ കയ്യിൽ നിന്ന് വാങ്ങി കഴിച്ചിട്ടുണ്ട് (നിർബന്ധം പിടിച്ചു കരയുമ്പോൾ സ്വന്തം അമ്മയെ പോലെ കുറെ വാരി തന്നിട്ടുമുണ്ട്..)