ചാറ്റ്‌ജിപിടി പണിമുടക്കി: വലഞ്ഞ് ഉപയോക്താക്കൾ

News Desk

10 June 2025 10:08 PM

ഓപ്പൺ എഐയുടെ ഉടമസ്ഥതയിലുള്ള എഐ ചാറ്റ്‌ബോട്ടായ ചാറ്റ്‌ജിപിടി പണിമുടക്കി. 2025 ജൂൺ 10 ചൊവ്വാഴ്‌ച ഉച്ചയ്‌ക്ക് മുതലാണ് ചാറ്റ്‌ജിപിടി ഉപയോക്താക്കൾക്ക് സേവനങ്ങൾ ഉപയോഗപ്പെടുത്തുന്നതിൽ തടസം നേരിട്ടത്. ആഗോളതലത്തിൽ ചാറ്റ്ജിപിടി സേവനങ്ങൾക്ക് തടസം നേരിട്ടുകൊണ്ടിരിക്കുകയാണ്. എങ്കിലും ഇന്ത്യയിലും അമേരിക്കയിലും ഉള്ള ഉപയോക്താക്കൾക്കാണ് ചാറ്റ്‌ജിപിടിയുടെ എഐ സേവനങ്ങൾ പ്രയോജനപ്പെടുത്തുന്നതിൽ കൂടുതൽ തടസം നേരിടുന്നത്.

വെബ്‌സൈറ്റുകൾ ട്രാക്ക് ചെയ്യുന്ന പ്ലാറ്റ്‌ഫോമായ ഡൗൺഡിറ്റക്‌റ്ററിന്‍റെ കണക്കനുസരിച്ച്, ഇന്ന് ഉച്ചകഴിഞ്ഞ് 3 മണിയോടെയാണ് ഇന്ത്യ ഉൾപ്പെടെ ലോകമെമ്പാടുമുള്ള നിരവധി ആളുകൾക്ക് ചാറ്റ്‌ജിപിടി ഉപയോഗിക്കുന്നതിൽ പ്രശ്‌നമുണ്ടായത്. വെബ്‌സൈറ്റിലെ കണക്കുകൾ അനുസരിച്ച് ഈ സമയത്തിനുള്ളിൽ ഇന്ത്യക്കാരിൽ നിന്ന് 800-ഓളം പരാതികൾ ലഭിച്ചിട്ടുണ്ട്. അവരിൽ 88% പേരും ചാറ്റ്ജിപിടിയുടെ വെബ് ആപ്പുമായി ബന്ധപ്പെട്ട പ്രശ്‌നങ്ങളെക്കുറിച്ചാണ് പരാതിപ്പെട്ടത്. അതേസമയം, 8% ഉപയോക്താക്കളും മൊബൈൽ ആപ്പുമായി ബന്ധപ്പെട്ട പരാതികളും 4% പേർ എപിഐയുമായി ബന്ധപ്പെട്ട പരാതികളും ഫയൽ ചെയ്‌തിട്ടുണ്ട്.

ഡൗൺഡിറ്റക്‌റ്ററിന്‍റെ കണക്കുകൾ പരിശോധിക്കുമ്പോൾ, ചാറ്റ്‌ജിപിടിയുടെ പണിമുടക്കൽ ഏറ്റവും കൂടുതൽ ബാധിച്ചത് യുഎസ് ഉപയോക്താക്കളെയാണ്. യുഎസിൽ ആയിരത്തിലധികം ഉപയോക്താക്കളാണ് ചാറ്റ്‌ജിപിടി പ്രവർത്തിക്കുന്നില്ലെന്ന് പരാതിപ്പെട്ടത്. ഇതിൽ 92 ശതമാനം ആളുകളും ചാറ്റ്‌ജിപിടി വെബ് ആപ്പുമായി ബന്ധപ്പെട്ട പ്രശ്‌നങ്ങളെക്കുറിച്ചും, 7% ആളുകൾ ആപ്പുമായി ബന്ധപ്പെട്ടും, 1% ആളുകൾ ലോഗിൻ സംബന്ധിച്ച പ്രശ്‌നങ്ങളെക്കുറിച്ചും ആണ് പരാതിപ്പെട്ടത്.