തിരുവനന്തപുരം കോര്‍പ്പറേഷന്‍ മേയര്‍ തെരഞ്ഞെടുപ്പ് ഇന്ന്

Ajith.A

12 November 2019 09:37 AM

തിരുവനന്തപുരം : സംസ്ഥാനത്തെ ഏറ്റവും വലിയ മുന്‍സിപ്പല്‍ കോര്‍പ്പറേഷനായ തിരുവനന്തപുരത്തിന്റെ പുതിയ നഗര പിതാവിനെ ഇന്നറിയാം. നാല് വര്‍ഷം നഗരസഭയെ നയിച്ച മുന്‍ മേയര്‍ വി കെ പ്രശാന്ത് വട്ടിയൂര്‍കാവ് എംഎല്‍എയായതിനെ തുടര്‍ന്നുണ്ടായ ഒഴിവിലേക്കാണ് മേയര്‍ തിരഞ്ഞെടുപ്പ് നടക്കുന്നത്. ഇന്ന് രാവിലെ പതിനൊന്ന് മണിയോടെ കോര്‍പ്പറേഷന്‍ ഹാളില്‍ നടക്കുന്ന തിരഞ്ഞെടുപ്പ് കേവല ഭൂരിപക്ഷമില്ലാത്ത തിരുവനന്തപുരം നഗരസഭയുടെ ഭാവി നിര്‍ണയിക്കുന്നതായി മാറും. നൂറ് വാര്‍ഡ് കൗണ്‍സിലര്‍മാരുള്ള തിരുവനന്തപുരം കോര്‍പ്പറേഷനില്‍ 43 അംഗങ്ങളുള്ള എല്‍ഡിഎഫാണ് ഏറ്റവും വലിയ മുന്നണി. ബിജെപിക്ക് 35 അംഗങ്ങളുളളപ്പോള്‍ യുഡിഎഫിന് 21 കൗണ്‍സിലര്‍മാരാണുളളത്. ഒരു സ്വതന്ത്ര അംഗവുമുണ്ട്.

ആരോഗ്യ സ്ഥിരം സമിതി അദ്ധ്യക്ഷനും ചാക്ക വാര്‍ഡ് കൗണ്‍സിലറുമായ കെ ശ്രീകുമാറാണ് എല്‍ഡിഎഫിന്റെ മേയര്‍ സ്ഥാനാര്‍ഥി. നേമം വാര്‍ഡ് കൗണ്‍സിലറും കോര്‍പ്പറേഷന്‍ പാര്‍ലമെന്ററി പാര്‍ട്ടി നേതാവുമായ എം ആര്‍ ഗോപനാണ് ബിജെപിയ്ക്കു വേണ്ടി മത്സരിക്കുന്നത്. യുഡിഎഫ് സ്ഥാനാര്‍ഥിയായി പേട്ട കൗണ്‍സിലറും കക്ഷിനേതാവുമായ ഡി അനില്‍ കുമാര്‍ മത്സരിക്കുന്നു.

കേവല ഭൂരിപക്ഷമില്ലാത്ത കൗണ്‍സിലില്‍ പൊതു സ്വതന്ത്രനെ നിര്‍ത്തിയാല്‍ പിന്തുണയ്ക്കാമെന്ന നിലപാടാണ് ബിജെപിയും യുഡിഎഫും കൈക്കൊണ്ടത്. എന്നാല്‍ നഗരസഭയിലെ ഏക സ്വതന്ത്ര കൗണ്‍സിലറായ ശ്രീകാര്യം വാര്‍ഡിലെ ലതാകുമാരി മത്സരക്കുന്നില്ലെന്ന നിലപാട് സ്വീകരിച്ചതോടെ സ്ഥാനാര്‍ഥികളെ മത്സരിപ്പിക്കാന്‍ യുഡിഎഫും ബിജെപിയും തീരുമാനം കൈക്കൊള്ളുകയായിരുന്നു. വി കെ പ്രശാന്തിന്റെ രാജിയോടെ ഒഴിവുവന്ന കഴക്കൂട്ടം വാര്‍ഡ് മാറ്റി നിറുത്തിയാല്‍ 42 അംഗങ്ങളുടെ പിന്തുണ എല്‍എഡിഎഫിനുള്ളത് കെ ശ്രീകുമാറിന്റെ വിജയം ഉറപ്പാക്കുന്നു.