നെടുമ്പാശേരിയിൽ നിന്ന് ഇന്ന് മുതല് പകല് സര്വ്വീസില്ല
നെടുമ്പാശേരി: കൊച്ചി അന്താരാഷ്ട്ര വിമാനത്താവളത്തില് നിന്നും ഇന്ന് മുതല് പകല് സമയം സര്വ്വീസില്ല. റണ്വേ നവീകരണത്തിന്റെ ഭാഗമായി 2020 മാര്ച്ച് 28 വരെ പകല് സമയം വിമാനസര്വ്വീസുകള് ഉണ്ടാകില്ല. എല്ലാ ദിവസവും രാവിലെ 10ന് റണ്വേ അടച്ചു വൈകുന്നേരം ആറിന് തുറക്കും.
മിക്ക സര്വ്വീസുകളും വൈകുന്നേരം ആറ് മുതല് രാവിലെ 10 വരെയുള്ള സമയത്തേക്ക് പുന:ക്രമീകരിച്ചിട്ടുണ്ട്. അഞ്ച് സര്വ്വീസുകള് മാത്രമാണ് റദ്ദാക്കിയിട്ടുള്ളത്. സ്പൈസ് ജെറ്റിന്റെ മാലദ്വീപ് സര്വീസ് മാത്രമാണ് രാജ്യാന്തര വിഭാഗത്തില് റദ്ദാക്കിയത്. വിവിധ എയര്ലൈനുകളുടെ അഹമ്മദാബാദ്, ഡല്ഹി, ചെന്നൈ, മൈസൂരു എന്നിവിടങ്ങളിലേക്കുള്ള ഓരോ സര്വ്വീസുകളും റദ്ദാക്കി. അതേസമയം ഒക്ടോബര് അവസാനവാരം നടപ്പാക്കി തുടങ്ങിയ ശീതകാല സമയപ്പട്ടികയില് നിരവധി സര്വ്വീസുകള് കൂട്ടിചേര്ത്തിട്ടുണ്ട്.
പകല് സമയം റണ്വേ അടച്ചിടുന്നതോടെ 16 മണിക്കൂറായി പ്രവര്ത്തന സമയം ചുരുങ്ങി. രാവിലെയും വൈകിട്ടും തിരക്ക് പ്രതീക്ഷിക്കുന്നതിനാല് ചെക്ക് ഇന് സമയം വര്ധിപ്പിച്ചിട്ടുണ്ട്. ആഭ്യന്തര യാത്രക്കാര്ക്ക് ഇനി മൂന്ന് മണിക്കൂര് മുമ്പും രാജ്യാന്തര യാത്രക്കാര്ക്ക് നാല് മണിക്കൂര് മുമ്പും ചെക്ക് ഇന് നടത്താം.