സി.എ.എ വിരുദ്ധ പ്രക്ഷോഭകര്ക്കെതിരെയുള്ള കേസുകള് തമിഴ്നാട് റദ്ദാക്കി
തെങ്കാശി(തമിഴ്നാട്): പൗരത്വ നിയമഭേദഗതിക്കെതിരെ സമരം ചെയ്തവര്ക്കെതിരെയെടുത്ത കേസുകള് റദ്ദാക്കുന്നതായി തമിഴ്നാട് മുഖ്യമന്ത്രി എടപ്പാടി കെ പളനിസ്വാമി. തെങ്കാശി കടയനെല്ലൂരില് തെരഞ്ഞെടുപ്പ് പ്രചാരണയോഗത്തിലാണ് എ.ഐ.എ.ഡി.എം.കെ മുഖ്യമന്ത്രി പളനിസ്വാമി പ്രഖ്യാപനം നടത്തിയത്. തമിഴ്നാട്ടില് ബി.ജെ.പിയുടെ മുഖ്യസഖ്യകക്ഷിയായ എ.ഐ.എ.ഡി.എം.കെ മുഖ്യമന്ത്രിയുടെ പ്രഖ്യാപനം രാഷ്ട്രീയ കേന്ദ്രങ്ങളില് ഞെട്ടലുണ്ടാക്കിയിട്ടുണ്ട്. കേസുകള് എഴുതിത്തള്ളണമെന്നും പൗരത്വ നിയമഭേദഗതിക്കെതിരെ നിയമസഭ പ്രമേയം പാസാക്കണമെന്നും ഡി.എം.കെ നേതാവ് എം.കെ സ്റ്റാലിന് നിരന്തരം ആവശ്യപ്പെടുന്നതിനിടയിലാണ് മുഖ്യമന്ത്രിയുടെ പ്രഖ്യാപനം.
മുഖ്യമന്ത്രി പറയുന്നതനുസരിച്ച് 1500 ഓളം കേസുകളാണ് തമിഴ്നാട്ടില് പൗരത്വ പ്രക്ഷോഭകര്ക്കെതിരെ ചുമത്തിയിട്ടുള്ളത്. പൊലീസിന്റെ കൃത്യനിര്വഹണം തടസപ്പെടുത്തുകയോ അക്രമമുണ്ടാക്കുകയോ ചെയ്ത സംഭവങ്ങളിലൊഴികെയുള്ള മുഴുവന് കേസുകളും റദ്ദാക്കിയെന്നാണ് എടപ്പാടി പളനിസ്വാമി പറഞ്ഞത്.
കോവിഡ് വ്യാപനം തടയുന്നതിന്റെ ഭാഗമായി ഏര്പ്പെടുത്തിയ ലോക്ഡൗണില് നിയന്ത്രണങ്ങള് ലംഘിച്ചവര്ക്കെതിരെ ചുമത്തിയ കേസുകളും റദ്ദാക്കിയെന്ന് മുഖ്യമന്ത്രി പറഞ്ഞു. വാഹന പരിശോധന നടത്തിയും മറ്റുമായി പത്തു ലക്ഷത്തോളം കേസുകള് ലോക്ഡൗണ് ലംഘനത്തില് പൊലീസ് ചാര്ജ് ചെയ്തിരുന്നുവെന്നും അവയില് പൊലീസിന്റെ കൃത്യനിര്വഹണം തടസപ്പെടുത്തുകയോ അക്രമമുണ്ടാക്കുകയോ ചെയ്ത സംഭവങ്ങളിലൊഴികെയുള്ള മുഴുവന് കേസുകളും റദ്ദാക്കിയെന്നും മുഖ്യമന്ത്രി എടപ്പാടി പറഞ്ഞു.
ജനങ്ങളുടെ ക്ഷേമം മുന് നിര്ത്തിയാണ് കേസുകള് റദ്ദാക്കുന്നതെന്നും വെള്ളിയാഴ്ച നടന്ന യോഗത്തില് എടപ്പാടി അറിയിച്ചു. കൂടങ്കുളം ആണവ പ്ലാന്റിനെതിരെ സമരം ചെയ്തവര്ക്കെതിരെ ചുമത്തിയ കേസുകള് റദ്ദാക്കുന്നത് സര്ക്കാറിന്റെ പരിഗണനയിലാണെന്നും മുഖ്യമന്ത്രി എടപ്പാടി അറിയിച്ചു.