സംസ്ഥാന സര്‍ക്കാരിന്റെ ഓണക്കിറ്റ് വിതരണം
സംസ്ഥാന സര്‍ക്കാരിന്റെ ഓണക്കിറ്റ് വിതരണം ആരംഭിച്ചു. 11 ഇനങ്ങളടങ്ങിയ പല വ്യഞ്ജന കിറ്റാണ് റേഷന്‍ കടകള്‍ വഴി ലഭിക്കുക. വിതരണത്തിന്റെ സംസ്ഥാനതല ഉദ്ഘാടനം തിരുവനന്തപുരത്ത് മന്ത്രി കടകംപള്ളി സുരേന്ദ്രന്‍ നിര്‍വഹിച്ചു.
ഓണത്തോടനുബന്ധിച്ച് സംസ്ഥാനത്തെ 88 ലക്ഷം വരുന്ന കാര്‍ഡ് ഉടമകള്‍ക്കാണ് സൗജന്യ ഓണക്കിറ്റ് ലഭിക്കുക. 500 രൂപയോളം വിലവരുന്ന 11 ഇനം പലവ്യഞ്ജനങ്ങള്‍ അടങ്ങുന്ന കിറ്റാണ് വിതരണം ചെയ്യുന്നത്. ആദ്യ ഘട്ടമായി മഞ്ഞ കാര്‍ഡ് ഉടമകള്‍ക്കാണ് കിറ്റ് ലഭ്യമാകുന്നത്. പിങ്ക് കാര്‍ഡുടമകള്‍ക്ക് 19 മുതല്‍ 22 വരെയുള്ള തീയതികളിലാണ് കിറ്റ് ലഭ്യമാകുക. ബാക്കി വരുന്ന നീല, വെള്ള വിഭാഗത്തില്‍പെട്ട കാര്‍ഡുടമകള്‍ക്ക് ഓണത്തിനു മുമ്പായി കിറ്റ് കിട്ടുമെന്നാണ് സര്‍ക്കാര്‍ അറിയിച്ചിട്ടുള്ളത്.
ഇതിനുപുറമെ നാളെ മുതല്‍ നീല, വെള്ള കാര്‍ഡുടമകള്‍ക്ക് 15 രൂപ നിരക്കിലുള്ള 10 കിലോ അരിയും നല്‍കുമെന്നാണ് വ്യക്തമാക്കിയിട്ടുള്ളത്. ഇതു കൂടാതെ പതിവു റേഷന്‍ വിതരണവും നടക്കും. ചടങ്ങില്‍ മന്ത്രി തിലോത്തമന്‍ അധ്യക്ഷത വഹിച്ചു.