ഡിവൈഎഫ്‌ഐ പ്രവര്‍ത്തകനെ കുത്തിക്കൊന്നു; പിന്നില്‍ ലീഗെന്ന് സിപിഎം
കാഞ്ഞങ്ങാട്: കാസര്‍ഗോഡ് കാഞ്ഞങ്ങാട് ഡിവെെഎഫ്‌ഐ പ്രവര്‍ത്തകനെ കുത്തിക്കൊലപ്പെടുത്തി. പഴയകടപ്പുറം മുണ്ടത്തോട് ഡിവൈഎഫ്‌ഐ യൂണിറ്റ് കമ്മിറ്റി അംഗം അബ്‌ദുള്‍ റഹ്‌മാന്‍ ഹൗഫാണ് കൊല്ലപ്പെട്ടത്. കൊലയ്‌ക്ക് പിന്നില്‍ മുസ്‌ലിം ലീഗാണെന്ന് ഡിവെെഎഫ്‌ഐയും സിപിഎമ്മും ആരോപിച്ചു. കഴിഞ്ഞ 130 ദിവസത്തിനുള്ളില്‍ രാഷ്ട്രീയ എതിരാളികളാല്‍ കേരളത്തില്‍ കൊല്ലപ്പെടുന്ന ആറാമത്തെ കമ്യൂണിസ്റ്റുകാരനാണ് അബ്‌ദുള്‍ റഹ്‌മാനെന്ന് സിപിഎം ആരോപിച്ചു.
നെഞ്ചിലേറ്റ ആഴത്തിലുള്ള മുറിവാണ് അബ്‌ദുള്‍ റഹ്മാന്റെ മരണത്തിലേക്കുനയിച്ചത്. സംഘര്‍ഷത്തില്‍ പരുക്കേറ്റ മുസ്‌ലിം ലീഗ് പ്രവര്‍ത്തകന്‍ ഇര്‍ഷാദിനെ മംഗളൂരുവിലെ ആശുപത്രിയില്‍ പ്രവേശിപ്പിച്ചു. പ്രതിഷേധ സൂചകമായി കാഞ്ഞങ്ങാട് നഗരസഭാ പരിധിയില്‍ എല്‍ഡിഎഫ് ഹര്‍ത്താല്‍ ആചരിക്കുകയാണ്.
തുടര്‍ സംഘര്‍ഷങ്ങള്‍ക്ക് സാധ്യതയുള്ളതിനാല്‍ ഡിവെെഎസ്‌പിയുടെ നേതൃത്വത്തില്‍ വലിയതോതില്‍ പൊലീസിനെ പ്രദേശത്ത് വിന്യസിച്ചിട്ടുണ്ട്.
തദ്ദേശ തിരഞ്ഞെടുപ്പ് വോട്ടെണ്ണല്‍ ദിനം മുതല്‍ കാഞ്ഞങ്ങാട് നഗരസഭയ്ക്ക് കീഴിലെ കല്ലൂരാവിയില്‍ മുസ്‌ലിം ലീഗ്-സിപിഎം സംഘര്‍ഷമുണ്ടായിരുന്നു. എല്‍ഡിഎഫിന് വോട്ടുകൂടി എന്ന് ആരോപിച്ച്‌ നഗരസഭാ മുപ്പത്തിയാറാം വാര്‍ഡില്‍ ഒരു കുടുംബത്തെ മുസ്‌ലിം ലീഗ് പ്രവര്‍ത്തകര്‍ വീട്ടില്‍ കയറി ആക്രമിക്കുന്ന ദൃശ്യങ്ങള്‍ പുറത്തുവന്നിരുന്നു.
തിരഞ്ഞെടുപ്പില്‍ എല്‍ഡിഎഫ് മുന്നേറ്റമുണ്ടാക്കിയത് ലീഗിനെയും യുഡിഎഫിനെയും അസ്വസ്ഥമാക്കുന്നതായും അതാണ് കാെലപാതകത്തിലേക്ക് നയിച്ചതെന്നും സിപിഎം ആരോപിക്കുന്നു. പൊലീസ് അന്വേഷണം ആരംഭിച്ചു. പരുക്കേറ്റ് ആശുപത്രിയില്‍ ചികിത്സയിലായിരിക്കുന്ന ലീഗ് പ്രവര്‍ത്തകര്‍ ഇര്‍ഷാദാണ് കേസിലെ മുഖ്യപ്രതി. കണ്ടാലറിയുന്ന മറ്റ് രണ്ട് പേര്‍ക്കെതിരെയും കേസ്.
Related News
കേരളീയം ചലച്ചിത്രമേള; നാലാം ദിനവും ഹൗസ്ഫുൾ
മന്ത്രിസഭയുടെ യുവ മുഖമായി മുഹമ്മദ് റിയാസ്
സിദ്ദിഖിന് വിട; ഔദ്യോഗിക ബഹുമതികളോടെ ഖബറടക്കി
മന്സൂര് വധക്കേസ് പ്രതിയെ മരിച്ച നിലയില് കണ്ടെത്തി