കെ പൊന്മുടി വീണ്ടും മന്ത്രി; സുപ്രീം കോടതിയുടെ നിർദേശപ്രകാരമാണ് കെ പൊന്മുടിയെ സത്യപ്രതിജ്ഞയ്ക്കായി ഗവർണർ ക്ഷണിച്ചത്

കെ പൊന്മുടി വീണ്ടും മന്ത്രിയായി സത്യപ്രതിജ്ഞ ചെയ്തു.രാജ്ഭവനിൽ 3.30ന് നടന്ന ചടങ്ങിൽ ഗവർണർ ആർ എൻ രവി പൊന്മുടിക്ക് സത്യവാചകം ചൊല്ലികൊടുത്തു. മുഖ്യമന്ത്രി എം കെ സ്റ്റാലിന്റെ സാന്നിധ്യത്തിലായിരുന്നു സത്യപ്രതിജ്ഞ.

സുപ്രീം കോടതിയുടെ നിർദേശപ്രകാരമാണ് കെ പൊന്മുടിയെ സത്യപ്രതിജ്ഞയ്ക്കായി ഗവർണർ ക്ഷണിച്ചത്. വരവിൽക്കവിഞ്ഞ സ്വത്ത് സമ്പാദിച്ചെന്ന കേസിൽ കഴിഞ്ഞ ഡിസംബറിൽ തടവുശിക്ഷ ലഭിച്ചതിനെത്തുടർന്നാണ് പൊൻമുടിയുടെ മന്ത്രിസ്ഥാനം നഷ്‌ടപ്പെട്ടത്. എന്നാൽ ശിക്ഷ സുപ്രീം കോടതി സ്റ്റേ ചെയ്‌തതിന് പിന്നാലെ സ്റ്റാലിൻ വീണ്ടും പൊന്മുടിയെ മന്ത്രിയാക്കാൻ ശുപാർശ ചെയ്‌തു. എന്നാൽ ഗവർണർ ഇതിനെ എതിർത്തതിന്റെ തുടർന്ന് തമിഴ്‌നാട്‌ സർക്കാർ കോടതിയെ സമീപിക്കുകയായിരുന്നു.

ഗവർണർ എന്താണ് ചെയ്യുന്നതെന്നും കോടതിയെ എതിർക്കുകയാണ് ചെയ്യുന്നതെന്നും സുപ്രീം കോടതി വിമർശിച്ചു. ഗവർണർ ഉടൻ നടപടിയെടുത്തില്ലെങ്കിൽ വെള്ളിയാഴ്‌ച തങ്ങൾക്ക് ഉത്തരവിടേണ്ടിവരുമെന്നും കോടതി പറഞ്ഞിരുന്നു. ഇതിനു പിന്നാലെയായിരുന്നു കെ പൊന്മുടിയെ മന്ത്രിയാക്കാനുള്ള ഗവർണറുടെ ക്ഷണം.