തുഷാര് വെള്ളാപ്പള്ളിയെ കുടുക്കിയതെന്നു സൂചന;ശബ്ദരേഖ പുറത്ത്
ദുബായ്: സാമ്പത്തിക തട്ടിപ്പു കേസില് ബിഡിജെഎസ് നേതാവ് തുഷാര് വെള്ളാപ്പള്ളിയെ കുടുക്കിയതെന്നു സൂചന. ഇതിന് സാധുത നല്കുന്ന, നാസില് അബ്ദുള്ളയുടെ ഫോണ് സംഭാഷണത്തിന്റ ശബ്ദരേഖ പുറത്തു വന്നു. യുഎഇയില് കേസ് കൊടുക്കാന് നാസില് അബ്ദുള്ള ചെക്ക് സംഘടിപ്പിച്ചത് മറ്റൊരാളില് നിന്നാണെന്നു സംഭാഷണത്തില് നിന്ന് വ്യക്തമാകുന്നുണ്ട്.
കൂട്ടുകാരന് അഞ്ച് ലക്ഷം രൂപ നല്കിയാല് തുഷാറിന്റെ ബ്ലാങ്ക് ചെക്ക് തന്റെ കയ്യില് കിട്ടുമെന്ന് നാസില് സുഹൃത്തിനോട് പറയുന്ന ശബ്ദ സന്ദേശമാണ് പുറത്തായത്. തുഷാര് കുടുങ്ങിയാല് വെള്ളാപ്പള്ളി നടേശന് പണം തരുമെന്നും നാസില് പറയുന്നുണ്ട്. യുഎഇയില് തുഷാര് വെള്ളപ്പാള്ളി പലരേയും വിശ്വാസത്തിലെടുത്തു ബ്ലാങ്ക് ചെക്കില് ഒപ്പിട്ടുകൊടുത്തുവെന്നും നാസില് പറയുന്നു. തുഷാര് ദുബായിലെത്തി അറസ്റ്റിലാകുന്നതിനു മുന്പാണ് നാസില് സുഹൃത്തിനോടു സംസാരിക്കുന്നതെന്നും വാക്കുകളില് നിന്ന് വ്യക്തമാണ്.