കോവിഡിന് ശമനമില്ല; കര്‍ണാകടയില്‍ ലോക്ഡൗണ്‍ ജൂണ്‍ ഏഴുവരെ നീട്ടി
ബംഗളൂരു: കോവിഡ് വ്യാപനത്തിൻറെ പശ്ചാത്തലത്തില്‍ കര്‍ണാടകയില്‍ ലോക്ഡൗണ്‍ 14 ദിവസത്തേക്ക് കൂടി നീട്ടി. മേയ് 24 മുതല്‍ ജൂണ്‍ ഏഴുവരെയാണ് ലോക്ഡൗണ്‍ നീട്ടിയത്.
മുതിര്‍ന്ന മന്ത്രിമാരും ചീഫ് സെക്രട്ടറിയും മറ്റു വിദഗ്ധരുമായി സംസാരിച്ചതിന് ശേഷമാണ് ലോക്ഡൗണ്‍ നീട്ടാന്‍ തീരുമാനിച്ചതെന്ന് മുഖ്യമന്ത്രി ബി.എസ്. യെദ്യൂരപ്പ പറഞ്ഞു.
വിദഗ്ധരുടെ നിര്‍ദേശത്തിൻറെ അടിസ്ഥാനത്തിലാണ് ലോക്ഡൗണ്‍ നീട്ടാന്‍ തീരുമാനിച്ചതെന്നും ജനങ്ങളുടെ സഹകരണം പ്രതീക്ഷിക്കുന്നുവെന്നും യെദ്യൂരപ്പ പറഞ്ഞു.
കോവിഡ് വ്യാപിക്കുന്ന പശ്ചാത്തലത്തില്‍ ജനങ്ങള്‍ മാസ്ക് നിര്‍ബന്ധമായും ധരിക്കണമെന്നും സാമൂഹിക അകലം പാലിക്കണമെന്നും സാനിറ്റൈസര്‍ നിര്‍ബന്ധമാക്കണമെന്നും അദ്ദേഹം അഭ്യര്‍ഥിച്ചു.
കോവിഡിൻറെ രണ്ടാം തരംഗം രാജ്യത്ത് ആരംഭിച്ചതോടെ ഏപ്രില്‍ ഏഴുമുതല്‍ കര്‍ണാടകയില്‍ ലോക്ഡൗണ്‍ പ്രഖ്യാപിച്ചിരുന്നു. ഒരു മാസത്തിലേറെയായി ലോക്ഡൗണ്‍ പ്രഖ്യാപിച്ചിട്ടും ബംഗളൂരു നഗരത്തില്‍ ഉള്‍പ്പടെ രോഗവ്യാപനം കുറക്കാന്‍ സാധിച്ചിരുന്നില്ല. തുടര്‍ന്നാണ് ലോക്ഡൗണ്‍ നീട്ടാന്‍ സര്‍ക്കാര്‍ വീണ്ടും തീരുമാനിച്ചത്.
കര്‍ണാടകയില്‍ 24 മണിക്കൂറിനിടെ 32,218 പേര്‍ക്കാണ് കോവിഡ് സ്ഥിരീകരിച്ചത്. 353 മരണവും സ്ഥിരീകരിച്ചു. ഇതോടെ സംസ്ഥാനത്ത് രോഗം സ്ഥിരീകരിച്ചവരുടെ എണ്ണം 23,67,742 ആയി ഉയര്‍ന്നു. 24,207 പേരാണ് കര്‍ണാകടയില്‍ മരിച്ചതെന്നും ആരോഗ്യവകുപ്പ് അറിയിച്ചു. 5,14,238 പേരാണ് സംസ്ഥാനത്ത് ചികിത്സയിലുള്ളത്.
Related News
ലോക്ക്ഡൗൺ ഇളവുകൾ പ്രഖ്യാപിച്ച് മന്ത്രി വീണ ജോർജ്
സംസ്ഥാനത്ത് ഇന്ന് വാരാന്ത്യ ലോക്ക്ഡൗണ്
ഞായറാഴ്ച ക്രിസ്ത്യന് പള്ളികളില് പ്രാര്ഥനക്ക് കൂടുതല് ഇളവില്ലെന്ന് സര്‍ക്കാര്‍
തമിഴ്നാട്ടില് ലോക്ക്ഡൗണ് ജൂലൈ 5 വരെ നീട്ടി