പ്രളയ ദുരിതാശ്വാസം; തിരുവനന്തപുരത്തിന്റെ ടൺ കണക്കിന് സ്നേഹം; ഹീറോയായി മേയർ ബ്രോ

News Desk

14 August 2019 04:52 PM

തിരുവനന്തപുരം: മഴക്കെടുതിയില്‍ ദുരിതമനുഭവിക്കുന്നവരെ സഹായിക്കാന്‍ സമാനതകളില്ലാത്ത പ്രവര്‍ത്തനം നടത്തുകയാണ് തലസ്ഥാന നഗരസഭയുടെ അമരക്കാന്‍ മേയര്‍ വി.കെ. പ്രശാന്ത്. സോഷ്യല്‍ മീഡിയയില്‍ ഇപ്പോള്‍ ചെറുപ്പക്കാരുടെ സ്വന്തം മേയര്‍ ബ്രോയാണ് വി.കെ. പ്രശാന്ത്. നഗരസഭ കേന്ദ്രീകരിച്ചു പ്രവർത്തിക്കുന്ന കളക്ഷൻ പോന്റിലൂടെയാണ് പ്രളയബാധിത പ്രദേശങ്ങളിലേക്ക് സാധനങ്ങൾ കയറ്റി അയക്കുന്നത്. മുപ്പതിലധികം ലോഡുകളാണ് ഇതുവരെ തിരുവനന്തപുരം നഗരസഭയിൽ നിന്നും പുറപ്പെട്ടത്.

നഗരസഭയിലെ പ്രോജക്‌ട് സെക്രട്ടേറിയറ്റിന്റെ നേതൃത്വത്തില്‍ പദ്ധതി ആവിഷ്കരിച്ച്‌ ഗ്രീന്‍ആര്‍മിയിലെ വോളന്റിയര്‍മാരിലൂടെയാണ് മേയര്‍ നഗരസഭയുടെ കളക്‌ഷന്‍ സെന്റര്‍ ചടുലമായി പ്രവര്‍ത്തിപ്പിക്കുന്നത്. ഫേസ്ബുക്കിലൂടെ ആവശ്യമായ സാധനങ്ങള്‍ക്കുള്ള അറിയിപ്പും ലഭ്യമാക്കും. നഗരസഭാ ആസ്ഥാനത്ത് 24 മണിക്കൂറും കൗണ്ടര്‍ പ്രവര്‍ത്തിക്കുന്നുണ്ട്. ഓരോ ദിവസവും പതിനേഴും പതിനെട്ടും മണിക്കൂറുകൾ വോളന്റീയർമാർക്കൊപ്പം സജീവമായി, വോളന്റിയർമാർക്ക് ഊർജ്ജം നൽകി മേയർ ബ്രോ ഉണ്ടാകും.

സോഷ്യൽ മീഡിയകളിൽ അഭിനന്ദന പ്രവാഹമാണ് മേയർക്ക്. സ്‌കൂൾ കുട്ടികൾ മുതൽ മന്ത്രിമാർവരെ മേയർക്ക് അഭിനന്ദനവുമായി രംഗത്തെത്തി. അഭിനന്ദനം പറയാൻ ട്രോളന്മാരും ഒട്ടും പിന്നിൽ അല്ല. പ്രളയം ബാധിച്ചവർക്കുള്ള സാധനങ്ങൾ മാത്രമ്മല. നല്ലൊരു മെഡിക്കൽ സംഘത്തെയും ഇവിടെ നിന്നും അയച്ചുകഴിഞ്ഞു.