ദുരിതാശ്വാസ ക്യാമ്പിലെ പണപ്പിരിവ്; ഓമനക്കുട്ടന് എതിരായ കേസ് പിൻവലിക്കും

News Desk

17 August 2019 01:47 PM

ആലപ്പുഴ: ദുരിതാശ്വാസ ക്യാമ്പിൽ നിന്ന് പണം പിരിച്ചെന്ന പരാതിയിൽ സിപിഎം പ്രാദേശിക നേതാവ് ഓമനക്കുട്ടനെതിരെ എടുത്ത കേസ് സര്‍ക്കാര്‍ പിൻവലിക്കും. റവന്യൂ പ്രിൻസിപ്പൽ സെക്രട്ടറിയുടെ നിര്‍ദ്ദേശപ്രകാരമാണ് കേസ് പിൻവലിക്കുന്നത്. ക്യാമ്പ് അംഗങ്ങൾക്കിടയിൽ പണപ്പിരിവു നടത്തിയെന്നത് ശരിയായ നടപടിയല്ലയെങ്കിലും ഓമനക്കുട്ടന്‍റെ ഉദ്ദേശശുദ്ധിയും പ്രവർത്തിയിലെ സത്യസന്ധതയും ബോധ്യപ്പെട്ടെന്ന് കാണിച്ച് വിശദമായ ഫേസ് ബുക്ക് കുറിപ്പും റവന്യൂ പ്രിൻസിപ്പൽ സെക്രട്ടറി ഡോ.വേണു എഴുതിയിട്ടുണ്ട്.  കേസ് പിൻവലിക്കാൻ നിര്‍ദ്ദേശം നൽകുകയും ചെയ്ത സാഹചര്യത്തിൽ സസ്പെൻഷൻ നടപടി പിൻവലിക്കുമെന്ന് സിപിഎം വൃത്തങ്ങളും പറയുന്നു.