നാടിനു നല്ലതോതി 'മിഥുനത്തിൽ താലികെട്ട്'
ഒരു നല്ല കാര്യത്തിന് ഒരു നാടും നാട്ടാരും എങ്ങനെ ഒന്നിക്കാം എന്നതിന് ഉത്തമ ഉദാഹരണമായി 'മിഥുനത്തിൽ താലികെട്ട്'.രണ്ടാമതൊരു റേഡിയോ കല്യണത്തിനുകൂടി അനന്തപുരി സാക്ഷിയായി. കഴിഞ്ഞവർഷം തിരുവനന്തപുരത്തു നടന്ന താര-ലിബിൻ റേഡിയോ കല്യാണം ആരും മറക്കാനിടയില്ല. 92.7 BIG FM മലയാളത്തിന്റെ നേതൃത്വത്തിൽ നടന്ന "മിഥുനത്തിൽ താലികെട്ട്' എന്ന ആ ചടങ്ങ് രണ്ടാം വർഷത്തിലേക്ക് കടന്നപ്പോൾ, ഇത്തവണ ശീതൾ എന്ന പെൺകുട്ടിയുടെ കല്യാണത്തിനാണ് അനന്തപുരി സാക്ഷിയായത്.
തിരുവനന്തപുരം ജില്ലയിൽ കഴക്കൂട്ടത്ത് ബന്ധുവീട്ടിലാണ് ശീതളിന്റെ താമസം. ശ്രീചിത്രാ പുവർ ഹോമിൽ നിന്നുമുള്ള റെഫെറെൻസിലാണ് 92.7 BIG FM മലയാളം ശീതളിനെ കണ്ടെത്തുന്നത്. ജൂലൈ 7ന് കാര്യവട്ടം സ്പോർട്സ് ഹബ്ബിലെ ട്രാവൻകൂർ ഇന്റർനാഷണൽ കൺവെൻഷൻ സെന്ററിൽ വച്ചാണ് വിവാഹം നടന്നത്. കൊല്ലംകാരനായ ഷൈൻ ആയിരുന്നു വരൻ. പകൽ 11:10 നും 11:40 നും ഇടയിലുള്ള ശുഭമുഹൂർത്തത്തിലാണ് വിവാഹം നടന്നത്.
92.7 BIG FM മലയാളത്തിന്റെ പ്രോഗ്രാം ഹെഡ് കിടിലം ഫിറോസ് ആണ് പെൺകുട്ടിയുടെ സഹോദര സ്ഥാനത്ത് നിന്നും കല്യാണം നടത്തുന്നത്. ഒപ്പം ബന്ധുക്കളായി 92.7 BIG FM മലയാളത്തിന്റെ മുഴുവൻ ടീം അംഗങ്ങളും ഉണ്ടായിരുന്നു.ഏറെ പ്രത്യേകതകൾ നിറഞ്ഞതായിരുന്നു ഈ വിവാഹം. കല്യാണമണ്ഡപത്തിനു സമീപമായി രക്തദാന ക്യാമ്പും വിവാഹത്തിൽ പങ്കെടുത്തവർക്ക് വൃക്ഷത്തൈകളും പച്ചക്കറി വിത്തുകളും നൽകി. പ്ലാസ്റ്റിക് കഴിവതും ഒഴിവാക്കികൊണ്ടായിരുന്നു കല്യാണ ചടങ്ങുകളും സദ്യയുമെല്ലാം.
മറ്റൊരു പ്രത്യേകത, കല്യാണമണ്ഡപവും, സദ്യയും, ആഭരണങ്ങളും വസ്ത്രങ്ങളും ഉൾപ്പെടെ എല്ലാം തിരുവനന്തപുരം നിവാസികളുടെ സ്നേഹസമ്മാനമായിരുന്നു ഈ വിവാഹത്തിന്. കേരളകൗമുദിക്കൊപ്പം ആറ്റിങ്ങൽ സ്വയംവര സിൽക്സും, നെടുമങ്ങാട് പേരേപ്പാടൻസ് ഗോൾഡ് പാർക്കും ഈ സംഭരംഭത്തിൽ പങ്കാളികളായി.
സമദ് ആശുപത്രി, സദ്യ സമ്മാനമായി നൽകി അക്ഷയ കാറ്ററിങ്ങും ഒപ്പമുണ്ടായിരുന്നു. കല്യാണ ഫോട്ടോഗ്രാഫി സൗജന്യമായി ചെയ്തത് ലവ് ഹാർട്സ് എന്ന വെഡിങ് ഫോട്ടോഗ്രാഫി ടീമാണ്. മണ്ഡപമൊരുക്കാൻ വിസ്മയ ഇവന്റ് മാനേജ്മെന്റ് ടീമും ഹാപ്പി വെഡിങ്സ് മാനേജ്മെന്റ് ടീമും മുന്നിൽത്തന്നെ ഉണ്ടായിരുന്നു. ഉണ്ണിഗണപതി ട്രാവൽസ് ട്രാവൽ പാർട്ണറായി സംഭരംഭത്തിൽ പങ്കാളികളായി.
ദേവസ്വം ടൂറിസം വകുപ്പ് മന്ത്രി കടകംപള്ളി സുരേന്ദ്രൻ ഉൾപ്പെടെ രാഷ്ട്രീയ, സാമൂഹിക സിനിമ രംഗത്തെ നിരവധി പ്രമുഖരുൾപ്പെടെ രണ്ടായിരത്തി അഞ്ഞൂറോളം പേരാണ് ചടങ്ങിൽ പങ്കെടുത്തത്.