വാഹനം ഓടിക്കുമ്പോൾ ബ്ലൂടൂത്ത് ഉപയോഗിച്ച് സംസാരിക്കുന്നത് കുറ്റകരമല്ല
തിരുവനന്തപുരം: വാഹനം ഓടിക്കുമ്പോൾ ബ്ലൂടൂത്ത് ഉപയോഗിച്ച് സംസാരിക്കുന്നത് കുറ്റകരമല്ലെന്ന് മോട്ടോര് വാഹന വകുപ്പ്. നിയമത്തിലെ പുതിയ ഭേദഗതി അനുസരിച്ച് ഡ്രൈവറുടെ കൈയില് പിടിച്ച് ഉപയോഗിക്കുന്ന മൊബൈല് പോലുള്ള വാര്ത്താ വിനിമയ സംവിധാനങ്ങള്ക്കാണ് വിലക്കുള്ളത്. ഈ സാഹചര്യത്തില് മറ്റെവിടെയെങ്കിലും ഘടിപ്പിക്കാവുന്ന ബ്ലൂടൂത്ത് വഴി സംസാരിക്കുന്നത് നിയമ ലംഘനമാകില്ല. അപകടകരമായി വാഹനമോടിക്കുന്നത് സംബന്ധിച്ച 184ാം വകുപ്പിലാണ് (അനുബന്ധം സി) ഈ ഭേദഗതിയുള്ളത്.
ആധുനിക സൗകര്യങ്ങളോടെ ഇറങ്ങുന്ന കാറുകളില് ഫോണിലെ ബ്ലൂടൂത്ത് കാറിലെ സ്പീക്കറുമായി ബന്ധിപ്പിക്കാന് കഴിയും. വാഹനം ഓടിക്കുന്നതിനിടെ അത്യാവശ്യ കോളുകള് എടുക്കേണ്ടി വന്നാല് കാതില് ചേര്ത്തു പിടിച്ച് സംസാരിക്കേണ്ട എന്നതാണ് ഇതിന്റെ മെച്ചം.
ഗതാഗത നിയമ ലംഘനങ്ങളുടെ പിഴ കുത്തനെ വര്ധിപ്പിച്ചുള്ള മോട്ടോര് വാഹന നിയമഭേദഗതി സംസ്ഥാനത്ത് ഇന്നലെ മുതല് നിലവില് വന്നതോടെയാണ് ബ്ലൂടൂത്ത് ഘടിപ്പിച്ച് ഫോണില് സംസാരിക്കുന്നത് കുറ്റകരമാകുമോ എന്നത് സംബന്ധിച്ച് ചോദ്യങ്ങളുയര്ന്നത്. വാഹനം ഓടിക്കുമ്പോൾ മൊബൈല് ഫോണില് സംസാരിച്ചാല് പുതിയ നിയമപ്രകാരം 10,000 രൂപയാണ് പിഴ.