യു.എ.ഇയില്നിന്നുള്ള വിമാനങ്ങള്ക്ക് വിലക്കേര്പ്പെടുത്തി ബ്രിട്ടന്; ലോകത്തെ ഏറ്റവും തിരക്കേറിയ റൂട്ടും നിര്ത്തുന്നു
ലണ്ടന്: വകഭേദം വന്ന കോവിഡ് വ്യാപിക്കുന്ന പശ്ചാത്തലത്തില് യു.എ.ഇയില്നിന്നുള്ള യാത്രാ വിമാനങ്ങള്ക്ക് വിലക്കേര്പ്പെടുത്തി ബ്രിട്ടന്. വെള്ളിയാഴ്ചയാണ് നിരോധനം നിലവില് വന്നത്. ഇതോടെ ലോകത്തിലെ ഏറ്റവും തിരക്കേറിയ വിമാന റൂട്ടുകളിലൊന്നായ ദുബൈ - ലണ്ടന് സര്വിസും താല്ക്കാലികമായി ഉണ്ടാകില്ല.
യു.എ.ഇക്ക് പുറമെ ബുറുണ്ടി, റുവാണ്ട എന്നീ രാജ്യങ്ങളിലേക്കും വിമാന വിലക്ക് ഏര്പ്പെടുത്തിയിട്ടുണ്ട്. ഈ രാജ്യങ്ങളിലൂടെ വരുന്നവര്ക്ക് ബ്രിട്ടനിലേക്ക് പ്രവേശനം ഉണ്ടാകില്ല. എന്നാല് ബ്രിട്ടീഷ്, ഐറിഷ് പൗരന്മാര്ക്ക് നിയന്ത്രണങ്ങളോടെ നാട്ടില് തിരിച്ചെത്താം. ഇവര് യു.എ.ഇ ഒഴിവാക്കി മാറ്റു രാജ്യങ്ങളിലൂടെ വരണം. കൂടാതെ പത്തുദിവസം സെല്ഫ് ഐസൊലേഷനിലും കഴിയണം. ബ്രിട്ടനിലേക്കുള്ള എല്ലാ യാത്രാ വിമാനങ്ങളും നിര്ത്തിവെച്ചതായി എമിറേറ്റ്സും ഇത്തിഹാദ് എയര്വേയ്സും അറിയിച്ചു. ടിക്കറ്റ് എടുത്തവര് എയര്ലൈന്സുമായി ബന്ധപ്പെടണമെന്ന് ദുബൈ വിമാനത്താവളം അധികൃതര് പ്രസ്താവനയില് പറഞ്ഞു.
അബൂദബിയില്നിന്ന് യു.കെയിലേക്ക് ഇത്തിഹാദ് ദിവസവും മൂന്ന് വിമാനങ്ങള് സര്വിസ് നടത്തിയിരുന്നു. ദുബൈയില്നിന്ന് എമിറേറ്റ്സ് നാല് സര്വിസുകളും നടത്തിയിരുന്നു. ഇതിന് പുറമെ ബ്രിട്ടീഷ് എയര്വേഴ്സിെന്റ സര്വിസുമുണ്ടായിരുന്നു. ജനുവരിയില് ലോകത്തിലെ ഏറ്റവും തിരക്കേറിയ അന്താരാഷ്ട്ര വിമാന റൂട്ടായിരുന്നു ദുബൈ - ലണ്ടന്. 190,365 പേരാണ് ഈ റൂട്ടില് സഞ്ചരിച്ചത്. വിമാനങ്ങള് റദ്ദാക്കിയ പശ്ചാത്തലത്തില് യു.എ.ഇയിലുള്ള യു.കെ യാത്രക്കാരുടെ വിസ കാലാവധി സൗജന്യമായി ദീര്ഘിപ്പിച്ചു നല്കാന് യു.എ.ഇ തീരുമാനിച്ചിട്ടുണ്ട്. അടുത്ത ദിവസങ്ങളില് വിസാ കാലാവധി തീരുന്നവര്ക്ക് ഈ തീരുമാനം ആശ്വാസമേകും.