ലോക്ക്ഡൗണ് ഇളവുകള് സംബന്ധിച്ച കാര്യങ്ങള് വെബ്സൈറ്റില് ഉള്പ്പെടുത്തും : ചീഫ് സെക്രട്ടറി
തിരുവനന്തപുരം: സംസ്ഥാനത്ത് ലോക്ക് ഡൗണ് ഇളവുകള് സംബന്ധിച്ച് കൃത്യമായ മാര്ഗനിര്ദ്ദേശം പുറത്തിറക്കാത്തത് വലിയ ആശയകുഴപ്പം സൃഷ്ടിച്ചെന്ന് ചീഫ് സെക്രട്ടറി ടോം ജോസ് . മുഖ്യമന്ത്രി ശനിയാഴ്ച പ്രഖ്യാപിച്ച ഇളവുകള് സംബന്ധിച്ച കാര്യങ്ങള് ഉത്തരവായി ഇതുവരെ പുറത്തിറങ്ങിയിട്ടില്ല. ഇളവുകള് സംബന്ധിച്ച കാര്യങ്ങള് വെബ്സൈറ്റില് ഉള്പ്പെടുത്തുമെന്നും അദ്ദേഹം അറിയിച്ചു . കേന്ദ്രം പ്രഖ്യാപിച്ച എല്ലാ ഇളവുകളും സംസ്ഥാനത്ത് നടപ്പാക്കില്ലെന്ന് മുഖ്യമന്ത്രി പിണറായി വിജയന് നേരത്തെ പറഞ്ഞിരുന്നു. മുഖ്യമന്ത്രിയുടെ ശനിയാഴ്ചത്തെ വാര്ത്താ സമ്മേളനത്തില് ഇത് വ്യക്തമാക്കിയിരുന്നു . മദ്യശാലകള് തുറക്കില്ലെന്നും ഗ്രീന് സോണില് പൊതുഗതാഗതം അനുവദിക്കില്ലെന്നും തുടങ്ങി നിരവധി കാര്യങ്ങളില് കേരളത്തില് പ്രത്യേക നിയന്ത്രണമുണ്ട്.
അതേസമയം കടകള് തുറക്കുന്നത്, ഏതൊക്കെ വാഹനങ്ങള് നിരത്തിലിറക്കാം, ഒറ്റ – ഇരട്ട അക്ക വാഹനങ്ങള്ക്ക് നിയന്ത്രണമുണ്ടോ തുടങ്ങിയ കാര്യങ്ങളില് ഇനിയും വ്യക്തത വരേണ്ടതുണ്ടെന്ന് ചീഫ് സെക്രട്ടറി പറഞ്ഞു . ഇത്തരത്തില് എന്തെങ്കിലും പരാതിയുണ്ടെങ്കില് അത് പരിഹരിക്കും . ഇക്കാര്യങ്ങള് വെബ്സൈറ്റില് ഉള്പ്പെടുത്തുമെന്നും ചീഫ് സെക്രട്ടറി വ്യക്തമാക്കി . അതേസമയം ഇതര സംസ്ഥാനങ്ങളില് കുടുങ്ങിയ 30000 പേര് കഴിഞ്ഞ നാല് ദിവസത്തിനിടെ കേരളത്തിലേക്ക് തിരിച്ചെത്തിയെന്ന് ചീഫ് സെക്രട്ടറി അറിയിച്ചു. ഒരു ദിവസം 12500 പേര്ക്കാണ് കേരളത്തിലേക്ക് വരാന് അനുവാദം ഉള്ളത്.