സെക്രട്ടറിയേറ്റിലെ തീപിടിത്തം: തെളിവുകള് ഇന്ന് കോടതിയില് സമര്പ്പിക്കും
തിരുവനന്തപുരം: സെക്രട്ടറിയേറ്റിലുണ്ടായ തീപിടിത്തം അന്വേഷിക്കുന്ന പ്രത്യേക സംഘം സംഭവ സ്ഥലത്ത് നിന്ന് ശേഖരിച്ച തെളിവുകള് ഇന്ന് കോടതിയില് ഹാജരാക്കും. പരിശോധനകള്ക്കായി ഫൊറന്സിക് ലാബിലേക്ക് അയക്കുന്നതിന് വേണ്ടി ശേഖരിച്ച ശാസ്ത്രീയ തെളിവുകളാണ് കോടതിയില് സമര്പ്പിത്തുന്നത്. സംഭവസ്ഥലത്ത് നിന്നുള്ള സിസിടിവി ദൃശ്യങ്ങളും അന്വേഷണ സംഘം ശേഖരിക്കും. ഫൊറന്സിക് ഫലം വന്നാലുടന് റിപ്പോര്ട്ട് സമര്പ്പിക്കാനാണ് പൊലീസ് ഒരുങ്ങുന്നത്.
അതേസമയം അന്വേഷണ സംഘം ഇന്ന് കൂടുതല് സാക്ഷികളുടെ മൊഴി രേഖപ്പെടുത്തും. തീപിടിത്തം ആദ്യം കണ്ട ജലവിഭവ വകുപ്പ് മന്ത്രിയുടെ ഓഫീസിലെ ജീവനക്കാരന്റെയും സ്ഥലത്തേക്ക് ഓടിയെത്തിവരുടെയും അടക്കം മൊഴികള് രേഖപ്പെടുത്തിയിരുന്നു. സംഭവത്തില് ക്രൈംബ്രാഞ്ചും അന്വേഷണം നടത്തുന്നുണ്ട്.
അതേസമയം തീപിടിത്തത്തിനു കാരണം ഷോര്ട്ട് സര്ക്യൂട്ട് തന്നെയെന്നാണ് വിദഗ്ധ സംഘത്തിന്റെ പ്രാഥമിക നിഗമനം. ദുരന്തനിവാരണ കമ്മീഷണര് എ.കൗശിഗന്റെ നേതൃത്വത്തിലുള്ള വിദഗ്ധ സംഘമാണ് സെക്രട്ടറിയേറ്റില് തീപിടിത്തമുണ്ടായ സ്ഥലം പരിശോധിച്ചത്. എഡിജിപി മനോജ് എബ്രഹാമിന്റെ നേതൃത്വത്തിലുള്ള സംഘവും സെക്രട്ടറിയേറ്റില് എത്തിയിരുന്നു. ഫാനില് നിന്നുള്ള ഷോര്ട്ട് സര്ക്യൂട്ട് ആണ് തീപിടിത്തത്തിനു ഇടയാക്കിയതെന്നാണ് പ്രാഥമിക നിഗമനം. ഫോറന്സിക് ഫലം വന്നാല് മാത്രമേ സ്ഥിരീകരിക്കാനാവൂ എന്ന് അന്വേഷണ സംഘം അറിയിച്ചു. അട്ടിമറി സാധ്യതയുള്പ്പെടെ വിദഗ്ധ സംഘം പരിശോധിക്കും.