പിഎസ്സിക്ക് കൃത്യമായി ഒഴിവുകള് റിപ്പോര്ട്ട് ചെയ്യാന് നടപടിക്രമം
പിഎസ്സിക്ക് ഒഴിവുകള് കൃത്യമായി റിപ്പോര്ട്ട് ചെയ്യുന്നതില് വീഴ്ച വരുത്തുന്ന നിയമനാധികാരികള്ക്ക് എതിരെ കര്ശന നടപടികള് സ്വീകരിക്കാന് മന്ത്രിസഭായോഗം തീരുമാനിച്ചു. ഒഴിവുകള് റിപ്പോര്ട്ട് ചെയ്യുന്നുണ്ട് എന്ന് ഉറപ്പുവരുത്താന് ചീഫ് സെക്രട്ടറിയും ഉദ്യോഗസ്ഥ ഭരണ പരിഷ്കാര വകുപ്പ് അഡീഷണല് ചീഫ് സെക്രട്ടറിയും ഉള്പ്പെടുന്ന കമ്മിറ്റി രൂപീകരിക്കും.
ഒഴിവുകള് റിപ്പോര്ട്ട് ചെയ്യുന്നതിലുള്ള തടസങ്ങള് ഒഴിവാക്കുന്നതിന് നടപടികള് സ്വീകരിക്കാനും തീരുമാനിച്ചു. സീനിയോറിറ്റി തര്ക്കം കോടതി മുമ്ബാകെ നിലനില്ക്കുകയും കോടതി റഗുലര് പ്രൊമോഷന് സ്റ്റേ ചെയ്തുകൊണ്ട് ഇടക്കാല ഉത്തരവ് നല്കിയതുമായ കേസുകളില് മാത്രം താല്ക്കാലിക പ്രൊമോഷന് നടത്തി അതിന്റെ ഫലമായി വരുന്ന ഒഴിവുകള് പിഎസ്സിക്ക് റിപ്പോര്ട്ട് ചെയ്യാന് വകുപ്പ് അധ്യക്ഷന്മാര്ക്ക് നിര്ദേശം നല്കും.
പ്രൊമോഷന് അര്ഹതയുള്ള ഉദ്യോഗസ്ഥര് ഇല്ലാത്തതിനാല് പ്രൊമോഷന് നടക്കാത്ത സാഹചര്യം ചില വകുപ്പുകളിലുണ്ട്. ഇത്തരം പ്രൊമോഷന് തസ്തികകള് പിഎസ്സി ലിസ്റ്റ് നിലവിലുള്ള കേഡറിലേക്ക് താല്ക്കാലികമായി തരംതാഴ്ത്തി ഒഴിവുകള് പിഎസ്സിക്ക് റിപ്പോര്ട്ട് ചെയ്യാന് വകുപ്പ് അധ്യക്ഷന്മാര്ക്ക് നിര്ദേശം നല്കും. അര്ഹതയുള്ള ഉദ്യോഗസ്ഥര് ലഭ്യമാകുന്ന മുറയ്ക്ക് താല്ക്കാലികമായി ഡീ-കേഡര് ചെയ്ത നടപടി ഭേദഗതി ചെയ്യും.
ഈ നടപടികള് പത്തു ദിവസത്തിനകം മുന്ഗണനാക്രമത്തില് നടപ്പാക്കുന്നതിന് മേല്നോട്ടം വഹിക്കാന് ചീഫ് സെക്രട്ടറിയെയും ധനകാര്യ അഡീഷണല് ചീഫ് സെക്രട്ടറി, ഉദ്യോഗസ്ഥ ഭരണപരിഷ്കാര വകുപ്പ് അഡീഷണല് ചീഫ് സെക്രട്ടറി എന്നിവരെയും ചുമതലപ്പെടുത്താന് തീരുമാനിച്ചു.