ന്യൂനമര്‍ദ്ദം ദുര്‍ബലമാകും, വടക്കന്‍ ജില്ലകളില്‍ മഴ തുടരും, അഞ്ച് ജില്ലകളില്‍ യെല്ലോ അലര്‍ട്ട്
അറബിക്കടലിലെ ന്യൂനമര്‍ദ്ദത്തിന്റെ ഫലമായി സംസ്ഥാനത്ത് മഴ തുടരുന്നതിനിടെ മുന്നറിയിപ്പുകള്‍. ഇന്ന് അഞ്ച് ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു. മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളിലാണ് ഇന്ന് യെല്ലോ അലര്‍ട്ട്. ചൊവ്വാഴ്ച പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, തൃശൂര്‍, പാലക്കാട്, മലപ്പുറം ജില്ലകള്‍ക്കാണ് യെല്ലോ അലര്‍ട്ട് നല്‍കിയത്. ഈ ജില്ലകളിലെ താഴ്ന്നപ്രദേശങ്ങള്‍, നദീതീരങ്ങള്‍, ഉരുള്‍പൊട്ടല്‍-മണ്ണിടിച്ചില്‍ സാധ്യതയുള്ള പ്രദേശങ്ങള്‍ എന്നിവിടങ്ങളില്‍ ജാഗ്രത പാലിക്കണമെന്നും മുന്നറിയിപ്പില്‍ പറയുന്നു.
അടുത്ത 24 മണിക്കൂറിനുളളില്‍ ന്യൂനമര്‍ദ്ദം ദുര്‍ബലമാകാനാണ് സാധ്യത. വടക്കന്‍ കേരളത്തില്‍ ഇന്നും മഴ തുടരും. കേരളം, കര്‍ണാടക, തമിഴ്നാട് എന്നി സംസ്ഥാനങ്ങളില്‍ അടുത്ത നാല് ദിവസം ഇടി മിന്നലോട് കൂടിയ മഴ തുടരാന്‍ സാധ്യതയുണ്ടെന്നാണ് കേന്ദ്ര കാലാവസ്ഥ വകുപ്പ് അറിയിച്ചത്. അറബിക്കടലിന്‍റെ തെക്ക് കിഴക്ക് ഭാഗത്ത് രൂപം കൊണ്ട ന്യൂനമര്‍ദ്ദത്തെ തുടര്‍ന്ന് ഞായറാഴ്ച സംസ്ഥാന വ്യാപകമായി കനത്ത മഴയാണ് പെയ്തത്. പ്രത്യേകിച്ച്‌ തെക്കന്‍ ജില്ലകളില്‍. അഞ്ച് ദിവസത്തിന് ശേഷം മഴയുടെ ശക്തി കുറയുമെന്നാണ് വിവരം.
ബുധനാഴ്ചവരെ സംസ്ഥാനത്ത് ഉയര്‍ന്ന തിരമാലയ്ക്കും കടലേറ്റത്തിനും സാധ്യതയുണ്ടെന്ന് ദേശീയ സമുദ്രസ്ഥിതി പഠന ഗവേഷണ കേന്ദ്രവും മുന്നറിയിപ്പ് നല്‍കിയിട്ടുണ്ട്. ബുധനാഴ്ചവരെ വേലിയേറ്റ സമയത്ത് താഴ്ന്നപ്രദേശങ്ങളില്‍ ജാഗ്രത വേണം. കടലേറ്റ സാധ്യതയും കനത്ത കാറ്റും വീശുന്നതിനാല്‍ മത്സ്യത്തൊഴിലാളികള്‍ വള്ളങ്ങളും ബോട്ടുകളും ഇറക്കുന്നത് ഒഴിവാക്കണമെന്ന് ദുരന്തനിവാരണ അതോറിറ്റി അഭ്യര്‍ഥിച്ചു.
Related News
‘യുക്രെയ്നിൽ പാരച്യൂട്ടിൽ പറന്നിറങ്ങുന്ന റഷ്യൻ സൈന്യം’ എന്ന തരത്തില് പ്രചരിപ്പിക്കുന്നത് പഴയ വീഡിയോ
ഇടുക്കി ഡാമിൽ ജലനിരപ്പ് ഉയരുന്നു. ഇന്ന് മാത്രം ഒഴുകിയെത്തിയത് 3 അടിയോളം ജലം
സംസ്ഥാനത്ത് കനത്ത മഴ തുടരും
അടുത്ത മൂന്ന് മണിക്കൂര് ശക്തമായ കാറ്റും മഴയും; 11 ജില്ലകളില്‍ യെല്ലോ അലര്‍ട്ട്