ക്വാറന്റൈന്‍ ലംഘിച്ച കൊല്ലം സബ് കളക്ടര്‍ അനുപം മിശ്രക്ക് സസ്‌പെന്‍ഷന്‍
കൊല്ലം: ക്വാറന്റൈന്‍ ലംഘിച്ച കൊല്ലം സബ് കളക്ടര്‍ അനുപം മിശ്രയെ സസ്‌പെന്‍ഡ് ചെയ്തു. സബ് കളക്ടറുടെ നിയമലംഘനത്തെപ്പറ്റി കളക്ടര്‍ റവന്യു മന്ത്രിക്ക് നല്‍കുകയും റിപ്പോര്‍ട്ടിന്റെ അടിസ്ഥാനത്തില്‍ ചട്ടലംഘനമാണ് നടന്നതെന്ന് കണ്ടെത്തുകയും ചെയ്തു. സബ് കളക്ടറുടെ പ്രവര്‍ത്തിക്കെതിരെ വകുപ്പുതല നടപടി വേണമെന്നും റവന്യു മന്ത്രി മുഖ്യമന്ത്രിക്ക് നല്‍കിയ റിപ്പോര്‍ട്ടില്‍ പറഞ്ഞിരുന്നു. കോവിഡ് 19 നിരീക്ഷണം ലംഘിച്ച്‌ മുങ്ങിയതിന് വിചിത്ര വിശദീകരണമായിരുന്നു കളക്ടര്‍ നല്‍കിയത്. കൂടുതല്‍ സുരക്ഷിതം എന്ന നിലയ്ക്കാണ് നാട്ടിലേക്ക് പോയതെന്നും തനിക്ക് ഭക്ഷണത്തിന് ബുദ്ധിമുട്ട് നേരിട്ടുവെന്നുമാണ് സബ്കളക്ടര്‍ പറഞ്ഞത്. എന്നാല്‍ ഔദ്യോഗിക വസതിയില്‍ ഭക്ഷണത്തിന് ബുദ്ധിമുട്ട് നേരിട്ടുവെന്ന സബ് കളക്ടറുടെ വാദം ജില്ലാ ഭരണകൂടം തള്ളി. സംഭവത്തില്‍ സബ് കളക്ടര്‍ക്കെതിരെ പൊലീസ് കേസെടുത്തു.
മധുവിധുവിനായി സിംഗപ്പൂരിലും മലേഷ്യയിലും പോയ ശേഷം പതിനെട്ടാം തീയതിയാണ് അനുപം മിശ്ര കൊല്ലത്ത് മടങ്ങി എത്തിയത്. തേവള്ളിയിലെ ഔദ്യോഗിക വസതിയില്‍ നിരീക്ഷണത്തില്‍ കഴിയാന്‍ 19-ാം തീയതിയാണ് കളക്ടര്‍ നിര്‍ദ്ദേശം നല്‍കിയത്. വീട്ടില്‍ രാത്രിയില്‍ വെളിച്ചം കാണാത്തതിനെ തുടര്‍ന്ന് സമീപവാസികള്‍ അറിയിച്ചതനുസരിച്ച്‌ കഴിഞ്ഞ ദിവസം ഉദ്യോഗസ്ഥരെത്തിയപ്പോഴാണ് സബ് കളക്ടര്‍ മുങ്ങിയ വിവരം പുറത്തറിഞ്ഞത്. ആരോഗ്യവകുപ്പിന്റെ പരാതിയുടെ അടിസ്ഥാനത്തില്‍ സബ്കളക്ടര്‍ക്കെതിരെ കൊല്ലം വെസ്റ്റ് പൊലീസ് കേസെടുത്തു. രണ്ട് വര്‍ഷം വരെ തടവും പിഴയും കിട്ടാവുന്ന വകുപ്പുകളാണ് ചുമത്തിയിട്ടുള്ളത്.