തിരുവനന്തപുരത്ത് യുവാവിന്റെ മൃതദേഹം കെട്ടിത്തൂക്കിയ നിലയില്‍, ശരീരത്തില്‍ മുറിവുകള്‍
തിരുവനന്തപുരം: യുവാവിന്റെ മൃതദേഹം കെട്ടിത്തൂക്കിയ നിലയില്‍ കണ്ടെത്തി. തിരുവനന്തപുരം ശ്രീകാര്യത്താണ് സംഭവം. ശ്രീകാര്യം ജങ്‌ഷനില്‍ സ്വകാര്യ ബാങ്കിന് സമീപത്തെ ആളൊഴിഞ്ഞ വീടിനോട് ചേര്‍ന്ന പ്രദേശത്താണ് മൃതദേഹം കെട്ടിത്തൂക്കിയ നിലയില്‍ കണ്ടെത്തിയത്.
കൊലപാതകമെന്നാണ് പൊലീസിന്റെ പ്രാഥമിക നിഗമനം. കൊല്ലപ്പെട്ടയാളുടെ ദേഹത്ത് മുറിവുകളുണ്ട്. ആദ്യം ആത്മഹത്യയെന്നാണ് പൊലീസ് കരുതിയത്. പിന്നീട് വിശദമായി പരിശോധിച്ചപ്പോഴാണ് മുഖത്തും ശരീരത്തും പരുക്കുകളുള്ളതായി ശ്രദ്ധയില്‍പ്പെട്ടത്.
മൃതദേഹം ആരുടേതാണെന്ന് തിരിച്ചറിഞ്ഞിട്ടില്ല. ഇയാള്‍ക്ക് ഏകദേശം 30 നും 40 നും ഇടയില്‍ പ്രായമുണ്ടെന്നാണ് പൊലീസ് പറയുന്നത്. കൊന്നതിനു ശേഷം കെട്ടിത്തൂക്കിയതാകാമെന്ന നിഗമനത്തിലാണ് പൊലീസ്. ഇന്‍ക്വസ്റ്റും പോസ്റ്റ്‌മോര്‍ട്ടവും നടത്തിയ ശേഷമേ കൂടുതല്‍ വ്യക്തത ലഭിക്കൂ.
ഇയാളുടെ കയ്യില്‍ ആശുപത്രിയില്‍ കുത്തിവയ്‌പ്പിനിടുന്ന കാനുണ്ട്. ആശുപത്രിയില്‍ നിന്ന് രക്ഷപ്പെട്ട ഏതെങ്കിലും രോഗിയാണോ എന്നാണ് പൊലീസ് സംശയിക്കുന്നത്. മൃതദേഹം കിടന്ന സ്ഥലത്ത് ചോരത്തുള്ളികള്‍ ചിതറിക്കിടപ്പുണ്ട്. ഡോഗ് സ്‌ക്വാഡ് സ്ഥലത്തെത്തി അന്വേഷണം നടത്തുകയാണ്.
Related News