പുതിയ ഇ-മെയില് തട്ടിപ്പിനെക്കുറിച്ച് മുന്നറിയിപ്പുമായി യൂട്യൂബ്
സൈബര് തട്ടിപ്പുകള് പുതിയ രീതികളിലാണ് അനുദിനം നടന്നു കൊണ്ടിരിക്കുന്നത്. പലപ്പോഴും യാഥാര്ത്ഥ്യമെന്ന് വിശ്വസിപ്പിക്കുന്ന തരത്തിലാണ് പല തട്ടിപ്പുകളും നടക്കുന്നത്.
ഓരോ തട്ടിപ്പുകളെകുറിച്ചും ഉപഭോക്താക്കള്ക്ക് കമ്ബനികളും അധികൃതരും മുന്നറിയിപ്പ് നല്കാറുണ്ടെങ്കിലും പലരും അതൊന്നും ശ്രദ്ധിക്കാറില്ല. അത്തരത്തിലൊരു മുന്നറിയിപ്പുമായാണ് യുട്യൂബ് രംഗത്ത് വന്നിരിക്കുന്നത്. യൂട്യൂബിന്റെ പേരിലുള്ള ഇമെയില് വഴി ഫിഷിംഗ് തട്ടിപ്പ് നടക്കുന്നുണ്ടെന്നാണ് കമ്ബനി ഉപയോക്താക്കള്ക്ക് മുന്നറിയിപ്പ് നല്കിയിരിക്കുന്നത്.
വ്യാജ യൂട്യൂബ് ഇമെയില് ഐഡിയില് നിന്ന് നിരവധി ആളുകള്ക്ക് സ്കാം മെയിലുകള് ലഭിക്കുന്നത് യുട്യൂബ് കണ്ടെത്തിയിരുന്നു. ഇത്തരം മെയിലുകളില് നല്കിയിരിക്കുന്ന ലിങ്കുകളില് ക്ലിക്ക് ചെയ്യരുതെന്നും മെയിലില് കാണുന്ന അറ്റാച്ച്മെന്റുകളൊന്നും ഡൗണ്ലോഡ് ചെയ്യരുതെന്നും ഉപയോക്താക്കള്ക്ക് യൂട്യൂബ് മുന്നറിയിപ്പ് നല്കി.
no-reply@youtube.com എന്ന ഐഡിയില് നിന്ന് ആളുകള്ക്ക് സ്കാം ഇമെയിലുകള് ലഭിക്കുന്നുണ്ടെന്ന് യുട്യൂബ് സ്ഥിരീകരിച്ചു. ഇത് ഒരു ഫിഷിംഗ് ആക്രമണമാണ്. യുട്യൂബ് ഈ ആക്രമണങ്ങളെ കുറിച്ച് അന്വേഷണം ആരംഭിച്ചിട്ടുണ്ട്, കൂടാതെ ഫിഷിംഗ് അറ്റാക്ക് വഴി തട്ടിപ്പ് നടത്തുന്നത് തടയാന് ചില സുരക്ഷാ മുന്കരുതലുകളും യുട്യൂബ് തന്നെ ഉപഭോക്താക്കള്ക്ക് നല്കുന്നുണ്ട്.