ത്രിരാഷ്ട്ര ഫുട്ബോൾ കിരീടം ഇന്ത്യയ്ക്ക്; കിർഗിസ്താനെ എതിരില്ലാത്ത രണ്ട് ഗോളുകൾക്ക് പരാജയപ്പെടുത്തി; സുനിൽ ചേത്രിയുടെ ഗോൾ നേട്ടം 85 ആയി

Abhijith

29 March 2023 06:57 AM

കിര്‍ഗിസ്ഥാനെ രണ്ട് ഗോളിന് തോല്‍പ്പിച്ച്‌ ഇന്ത്യക്ക് ത്രിരാഷ്ട്ര ഫുട്ബോള്‍ കിരീടം. സുനില്‍ ഛേത്രിയും പ്രതിരോധതാരം സന്ദേശ് ജിങ്കനും ഗോളടിച്ചു.

രാജ്യാന്തര ഫുട്ബോളില്‍ ഛേത്രിയുടെ 85–-ാംഗോളായി ഇത്. ആദ്യകളിയില്‍ മ്യാന്‍മറിനെ ഇന്ത്യ ഒരു ഗോളിന് തോല്‍പ്പിച്ചിരുന്നു.
ഇംഫാലിലെ കുമാന്‍ ലംപാക്ക് സ്റ്റേഡിയത്തില്‍ കളി ഇന്ത്യയുടെ നിയന്ത്രണത്തിലായിരുന്നു. അനിരുദ്ധ് ഥാപ്പയുടെ ഫ്രീകിക്കിലൂടെ ആദ്യനിമിഷങ്ങളില്‍ത്തന്നെ ഇന്ത്യ ആക്രമണ മനോഭാവം കാട്ടി. ഇതിനിടെ ലല്ലിയന്‍സുവാല ചങ്തെയുടെ മികച്ച ക്രോസ് ഥാപ്പ പാഴാക്കി. മറുവശത്ത് കിര്‍ഗിസ്ഥാന്റെ അലെക്സാണ്ടറിന്റെ ക്രോസ് ഗുര്‍പ്രീത് സിങ് സന്ധുവിന്റെ കൈയില്‍ തട്ടിത്തെറിച്ചെങ്കിലും അപകടമുണ്ടായില്ല.
അരമണിക്കൂര്‍ കഴിഞ്ഞപ്പോഴായിരുന്നു ഇന്ത്യയുടെ ഗോള്‍. ഫ്രീകിക്കില്‍നിന്നായിരുന്നു തുടക്കം. ബ്രണ്ടന്‍ ഫെര്‍ണാണ്ടസിന്റെ ഫ്രീകിക്ക് ബോക്സിന്റെ ഇടതുമൂലയിലേക്കായിരുന്നു. ജിങ്കന്‍ മുന്നില്‍ ഓടിയെത്തി. പ്രതിരോധമെത്തുംമുമ്ബ് കാല്‍വച്ചു.

ഇടവേളയ്ക്കുശേഷം ആദ്യശ്രമം കിര്‍ഗിസ്ഥാന്റെ ഭാഗത്തുനിന്നായിരുന്നു. എണിസ്റ്റിനാണ് അവസരം കിട്ടിയത്. അടിതൊടുക്കാനുള്ള സമയം കിട്ടിയിട്ടും സഹതാരത്തിന് കൈമാറുകയായിരുന്നു. ആകാശ് മിശ്ര ഇടപെട്ട് പന്ത് അടിച്ചകറ്റി. ഇന്ത്യന്‍ പ്രതിരോധം പെട്ടെന്നുതന്നെ സമ്മര്‍ദത്തിലായി. ഇതിനിടെ പരിശീലകന്‍ ഇഗര്‍ സ്റ്റിമച്ച്‌ മാറ്റങ്ങള്‍ വരുത്തി. മലയാളിതാരം സഹല്‍ അബ്ദുള്‍ സമദ് കളത്തിലെത്തി. കളിയുടെ അവസാനഘട്ടത്തിലായിരുന്നു രണ്ടാംഗോള്‍.

ചങ്തെ സുരേഷ് വാങ്മിലേക്ക് ക്രോസ് തൊടുത്തു. സുരേഷ് വലയുടെ വലതുമൂല ലക്ഷ്യമാക്കി അടിപായിച്ചു. ഇതിനിടെ മഹേഷ് സിങ്ങിനെ കിര്‍ഗിസ്ഥാന്‍ പ്രതിരോധം ബോക്സില്‍ വീഴ്ത്തി. ഇന്ത്യക്ക് അനുകൂലമായി പെനല്‍റ്റി. കിക്ക് എടുത്ത ഛേത്രിക്ക് പിഴച്ചില്ല. 133 മത്സരങ്ങളില്‍നിന്നാണ് ഛേത്രി 85 ഗോള്‍ തികച്ചത്. ഹംഗറിയുടെ വിഖ്യാത താരം ഫെറെങ്ക് പുസ്കാസിനെയാണ് ഗോളെണ്ണത്തില്‍ മറികടന്നത്. ഗോള്‍ വേട്ടക്കാരില്‍ അഞ്ചാംസ്ഥാനത്താണ് ഛേത്രി. നിലവില്‍ കളിക്കുന്നവരില്‍ പോര്‍ച്ചുഗലിന്റെ ക്രിസ്റ്റ്യാനോ റൊണാള്‍ഡോ (122), അര്‍ജന്റീനയുടെ ലയണല്‍ മെസി (100) എന്നിവര്‍ മാത്രമാണ് മുന്നില്‍.