ഹംഗേറിയൻ കൊടുങ്കാറ്റ് കേരളത്തിൽ; വിയെസ്റ്റെ 300 മാക്സി സ്കൂട്ടർ | വീഡിയോ
ഹംഗേറിയന് ഇരുചക്ര വാഹന നിര്മാതാക്കളായ കീവേയുടെ രണ്ട് സ്കൂട്ടര് മോഡലുകള് കേരളത്തില് അവതരിപ്പിച്ചു. റെട്രോ മോഡല് സിക്സ്റ്റീസ് 300ഐ ക്ലാസിക് സ്കൂട്ടര്, യൂറോപ്യന് മാതൃകയില് ഡിസൈന് നിര്വഹിച്ചിരിക്കുന്ന മാക്സി സ്കൂട്ടര് വിഎസ്റ്റെ 300 എന്നീ മോഡലുകളാണ് കീവേ കേരളത്തില് എത്തിച്ചിരിക്കുന്നത്. ഈ രണ്ട് മോഡലുകള്ക്കും 3,03,000 രൂപയാണ് കേരളത്തിലെ എക്സ്ഷോറൂം വിലയെന്നാണ് നിര്മാതാക്കള് അറിയിച്ചു. ഈ വര്ഷം അവസാനത്തോടെ എട്ട് പുതിയ മോഡലുകളാണ് കീവേ ഇന്ത്യക്കായി ഒരുക്കുന്നത്.
മാക്സി സ്കൂട്ടറായാണ് വിഎസ്റ്റെ 300 എത്തിയിട്ടുള്ളത്. കോംപാക്ട് ബോഡി ഡിസൈനിലാണ് ഈ സ്കൂട്ടര് രൂപകല്പ്പന ചെയ്തിട്ടുള്ളത്. 12 ലിറ്റര് പെട്രോള് ടാങ്ക്, ഹീറ്റഡ് ഗ്രിപ്പ്, കോണ്ടിനെന്റല് ബെല്റ്റ് ഡ്രൈവ് സിസ്റ്റം, മുന്നിലും പിന്നിലും ഡിസ്ക് ബ്രേക്ക്, ഡ്യുവല് ചാനല് എ.ബി.എസ്, ടെലിസ്കോപിക് ഷോക്ക് അബ്സോര്ബറുകള് എന്നിവയാണ് ഈ സ്കൂട്ടറിലെ ഫീച്ചറുകള്. എന്ജിനും മറ്റ് സാങ്കേതിക സംവിധാനങ്ങളും സിക്സ്റ്റീസുമായി പങ്കിട്ടാണ് ഈ സ്കൂട്ടറും എത്തുന്നത്.