ഇന്ത്യയ്ക്ക് സമ്പൂർണ്ണ വിജയം; വിൻഡീസിനെതിരായ ടി20 പരമ്പര തൂത്തുവാരി; റാങ്കിങ്ങിൽ ഇന്ത്യ ഒന്നാമത്
ഏകദിന പരമ്പരയ്ക്കു പിന്നാലെ വെസ്റ്റിന്ഡീസിനെതിരായ ട്വന്റി 20 പരമ്പരയും തൂത്തുവാരി ഇന്ത്യ. ട്വന്റി 20 പരമ്പരയിലെ മൂന്നാമത്തെയും അവസാനത്തെയും മത്സരത്തില് 17 റണ്സിനായിരുന്നു ഇന്ത്യന് വിജയം. ഇന്ത്യ ഉയര്ത്തിയ 185 റണ്സ് വിജയലക്ഷ്യം പിന്തുടര്ന്ന വെസ്റ്റിന്ഡീസിന് ഒമ്പത് വിക്കറ്റ് നഷ്ടത്തില് 167 റണ്സെടുക്കാനേ സാധിച്ചുള്ളൂ. ഈ വിജയത്തോടെ ഇന്ത്യ ടി20 റാങ്കിങ്ങിൽ ഒന്നാമതെത്തി.
തുടര്ച്ചയായ മൂന്നാം മത്സരത്തിലും അര്ധ സെഞ്ചുറി നേടിയ നിക്കോളാസ് പുരനാണ് വിന്ഡീസിന്റെ ടോപ് സ്കോറര്. 47 പന്തുകള് നേരിട്ട താരം ഒരു സിക്സും എട്ട് ഫോറുമടക്കം 61 റണ്സെടുത്തു. പുരനെ 18-ാം ഓവറില് ശാര്ദുല് താക്കൂറിന്റെ പന്തില് ഇഷാന് കിഷന് മികച്ചൊരു ക്യാച്ചിലൂടെ പുറത്താക്കുകയായിരുന്നു.
185 റണ്സ് വിജയലക്ഷ്യം പിന്തുടര്ന്ന് ബാറ്റിങ്ങിനിറങ്ങിയ വിന്ഡീസിന് ആദ്യ ഓവറില് തന്നെ ഓപ്പണര് കൈല് മില്സിനെ (6) നഷ്ടമായി. ദീപക് ചാഹറിനായിരുന്നു വിക്കറ്റ്. മൂന്നാം ഓവറില് ഷായ് ഹോപ്പിനെയും (8) ചാഹര് മടക്കി. പിന്നീട ഒന്നിച്ച നിക്കോളാസ് പുരന് - റോവ്മാന് പവല് സഖ്യം അതിവേഗം 47 റണ്സ് വിന്ഡീസ് സ്കോര്ബോര്ഡിലെത്തിച്ചു. 14 പന്തില് നിന്ന് 25 റണ്സെടുത്ത പവലിനെ മടക്കി ഹര്ഷല് പട്ടേലാണ് ഇന്ത്യയ്ക്ക് ബ്രേക് ത്രൂ സമ്മാനിച്ചത്. തുടര്ന്ന് ക്യാപ്റ്റന് കിറോണ് പൊള്ളാര്ഡ് (5), ജേസണ് ഹോള്ഡര് (2) എന്നിവരെ മടക്കി വെങ്കടേഷ് അയ്യര് വിന്ഡീസിനെ പ്രതിരോധത്തിലാക്കി. റോസ്റ്റന് ചേസിനും (12) കാര്യമായ സംഭാവന നല്കാനായില്ല.
ഏഴാം വിക്കറ്റില് ഒന്നിച്ച പുരന് - റൊമാരിയോ ഷെപ്പേര്ഡ് സഖ്യം ഇന്ത്യയ്ക്ക് വെല്ലുവിളിയാകുമെന്ന് തോന്നലുണര്ത്തിയിരുന്നു. 48 റണ്സ് കൂട്ടിച്ചേര്ത്ത ഈ സഖ്യം 18-ാം ഓവറില് ഷാര്ദുല് താക്കൂര് പൊളിച്ചു. 21 പന്തുകള് നേരിട്ട ഷെപ്പേര്ഡ് 3 സിക്സും 1 ഫോറുമടക്കം 29 റണ്സെടുത്തു. ഇന്ത്യയ്ക്കായി ഹര്ഷല് പട്ടേല് മൂന്ന് വിക്കറ്റ് വീഴ്ത്തി. ദീപക് ചാഹര്, വെങ്കടേഷ് അയ്യര്, ശാര്ദുല് താക്കൂര് എന്നിവര് രണ്ടു വിക്കറ്റ് വീതം വീഴ്ത്തി.
നേരത്തെ ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യ 20 ഓവറില് അഞ്ചു വിക്കറ്റ് നഷ്ടത്തില് 184 റണ്സെടുത്തിരുന്നു. തുടക്കം പതറിയ ഇന്ത്യക്ക് അവസാന ഓവറുകളില് തകര്ത്തടിച്ച സൂര്യകുമാര് യാദവ് - വെങ്കടേഷ് അയ്യര് സഖ്യമാണ് മികച്ച സ്കോര് സമ്മാനിച്ചത്. 31 പന്തില് നിന്ന് ഏഴ് സിക്സും ഒരു ഫോറുമടക്കം 65 റണ്സെടുത്ത സൂര്യകുമാര് യാദവാണ് ഇന്ത്യന് നിരയിലെ ടോപ് സ്കോറര്. ട്വന്റി 20-യില് താരത്തിന്റെ നാലാം അര്ധ സെഞ്ചുറിയാണിത്. വെങ്കടേഷ് അയ്യര് വെറും 19 പന്തില് നിന്ന് രണ്ട് സിക്സും നാല് ഫോറുമടക്കം 35 റണ്സോടെ പുറത്താകാതെ നിന്നു. അഞ്ചാം വിക്കറ്റില് 37 പന്തില് നിന്ന് 91 റണ്സാണ് ഈ സഖ്യം അടിച്ചുകൂട്ടിയത്.