അമര്‍ ജവാന്‍ ജ്യോതി അണയ്ക്കല്‍: ചരിത്ര യാഥാര്‍ത്ഥ്യങ്ങളെ തുടച്ചു നീക്കാനുള്ള ഫാഷിസത്തിന്റെ മറ്റൊരു ചുവടുവെപ്പ് - SDPI

Arun M

24 January 2022 02:51 PM

ന്യൂഡല്‍ഹി: ന്യൂഡല്‍ഹിയിലെ ഇന്ത്യാ ഗേറ്റില്‍ അരനൂറ്റാണ്ട് പഴക്കമുള്ള അമര്‍ ജവാന്‍ ജ്യോതി അണയ്ക്കല്‍ ചരിത്ര യാഥാര്‍ത്ഥ്യങ്ങളെ തുടച്ചുനീക്കാനുള്ള ഹിന്ദുത്വ ഫാഷിസ്റ്റ് ഭരണകൂടത്തിന്റെ മറ്റൊരു ചുവടുവെപ്പാണെന്ന് എസ്ഡിപിഐ ദേശീയ ജനറല്‍ സെക്രട്ടറി ഇല്യാസ് മുഹമ്മദ് തുംബെ. അമര്‍ ജവാന്‍ ജ്യോതി ഭരണകൂടം നശിപ്പിച്ചതില്‍ അതിശയിക്കാനില്ല. ചരിത്രപരമായ വസ്തുതകള്‍ മായ്ച്ചുകളയാനും അവരുടെ താല്‍പ്പര്യങ്ങള്‍ക്കനുസരിച്ച് ചരിത്രം തിരുത്തിയെഴുതാനും ഫാഷിസ്റ്റുകള്‍ ആഗ്രഹിക്കുന്നു. വ്യാജ ചരിത്രനിര്‍മിതിയുടെ മറ്റൊരു ചുവടുവെപ്പാണ് ഇത്. ഹിന്ദുത്വ ഫാഷിസം എന്നത് രാജ്യത്തെ സമൂഹത്തിലെ ചില വിഭാഗങ്ങളെക്കുറിച്ചുള്ള വിദ്വേഷത്തില്‍ കെട്ടിപ്പടുക്കുകയും അതിനനുസരിച്ച് നുണപ്രചാരണം നടത്തുകയും ചെയ്യുന്ന ഒരു പ്രത്യയശാസ്ത്രമാണ്. അതിനാല്‍, അവര്‍ യഥാര്‍ത്ഥ ചരിത്ര വസ്തുതകളെ ഭയപ്പെടുന്നു. കേന്ദ്രത്തില്‍ അധികാരത്തിലെത്തിയ മോദിയുടെ നേതൃത്വത്തിലുള്ള ഫാഷിസ്റ്റ് സര്‍ക്കാരിന്റെ ആദ്യത്തെ നടപടി പാര്‍ലമെന്റ് ലൈബ്രറിയിലെ രേഖകള്‍ കത്തിക്കുകയും സ്വാതന്ത്ര്യസമരത്തിന്റെയും രാജ്യത്തിന്റെ സ്വാതന്ത്ര്യത്തിന്റെയും തുടര്‍ന്നുള്ള ഗാന്ധി വധത്തിന്റെയും എല്ലാ രേഖകളും ഇല്ലാതാക്കുക എന്നതായിരുന്നു.
തെരുവുകള്‍, വിമാനത്താവളങ്ങള്‍, റെയില്‍വേ സ്റ്റേഷനുകള്‍ തുടങ്ങിയവയുടെ പേര് മാറ്റുന്നത് കേന്ദ്രത്തിലും അവര്‍ ഭരിക്കുന്ന സംസ്ഥാനങ്ങളിലും ആര്‍എസ്എസ് സര്‍ക്കാരിന്റെ പതിവാണ്. സെന്‍ട്രല്‍ വിസ്ത പദ്ധതി പൂര്‍ത്തീകരിച്ചതിന് ശേഷം പൊളിക്കേണ്ട സ്മാരകങ്ങളുടെ പട്ടികയില്‍ അടുത്തത് ഇപ്പോഴത്തെ പാര്‍ലമെന്റ് മന്ദിരമാണ്.

ഒന്നാം ലോകമഹായുദ്ധത്തില്‍ കൊല്ലപ്പെട്ട 84,000 ഇന്ത്യന്‍ സൈനികരുടെ സ്മരണയ്ക്കായി ബ്രിട്ടീഷുകാര്‍ ഇന്ത്യാ ഗേറ്റില്‍ പണികഴിപ്പിച്ച അമര്‍ ജവാന്‍ ജ്യോതി, 1971-ല്‍ പാകിസ്ഥാനെതിരെ പോരാടിയ 3,843 സൈനികരെ ആദരിക്കുന്നതിനായി 1972-ല്‍ അന്നത്തെ ഇന്ദിരാഗാന്ധി സര്‍ക്കാര്‍ അതിന്റെ കമാനത്തിന് കീഴില്‍ നിര്‍മ്മിച്ചു. നിലവിലെ ആര്‍എസ്എസ് സര്‍ക്കാര്‍ 2019ല്‍ അമര്‍ ജവാന്‍ ജ്യോതിയില്‍ നിന്ന് 400 മീറ്റര്‍ അകലെ ദേശീയ യുദ്ധസ്മാരകം നിര്‍മ്മിച്ചു. റിപ്പബ്ലിക് ദിനത്തിലും സ്വാതന്ത്ര്യദിനത്തിലും ഉള്‍പ്പെടെ സൈനികര്‍ക്ക് ആദരാഞ്ജലികള്‍ അര്‍പ്പിക്കാനുള്ള എല്ലാ ഔദ്യോഗിക പരിപാടികളും അമര്‍ ജവാന്‍ ജ്യോതിയില്‍ നിന്ന് പുതിയ ജ്വാല സ്ഥലത്തേക്ക് മാറ്റി. ഇപ്പോള്‍ അമര്‍ ജവാന്‍ ജ്യോതിയിലെ പഴയ ജ്വാല അണച്ച് ദേശീയ യുദ്ധസ്മാരകത്തില്‍ ഒരു ജ്വാല കത്തിക്കുന്നു.

ഇന്ത്യാ ഗേറ്റില്‍ ആലേഖനം ചെയ്തിട്ടുള്ള 84,000 സൈനികരുടെ പേരുകള്‍ ഒന്നാം ലോകമഹായുദ്ധത്തിലും ആംഗ്ലോ- അഫ്ഗാന്‍ യുദ്ധത്തിലും ബ്രിട്ടീഷുകാര്‍ക്ക് വേണ്ടി പോരാടിയ ചില രക്തസാക്ഷികളുടെ പേരുകള്‍ മാത്രമാണെന്നും കൊളോണിയല്‍ ഭൂതകാലത്തിന്റെ പ്രതീകമാണെന്നും ബിജെപി വക്താവ് ഉന്നയിച്ച ന്യായീകരണം യുദ്ധത്തില്‍ വീരമൃത്യു വരിച്ച ഇന്ത്യന്‍ സൈനികരെ നിര്‍വീര്യമാക്കുന്നതിന് തുല്യമാണ്.

ഈ അപമാനകരമായ പ്രവൃത്തിയെ ശക്തമായി അപലപിച്ച ഇല്യാംസ് തുംബെ സൈനികരോടുള്ള ഈ അനാദരവില്‍ പ്രതിഷേധിക്കാന്‍ ദേശസ്‌നേഹികളോട് അഭ്യര്‍ത്ഥിച്ചു.