OTT പ്ലാറ്റ്ഫോം വഴി വരുന്ന 'ചുരുളി' സിനിമ സര്ട്ടിഫൈഡ് പതിപ്പല്ലെന്ന് സെന്ട്രല് ബോര്ഡ് ഓഫ് ഫിലിം സര്ട്ടിഫിക്കേഷന്
സോണി ലൈവ്(Sony Liv) എന്ന ഒടിടി(OTT) പ്ലാറ്റ്ഫോം വഴി പ്രദര്ശിപ്പിച്ചുകൊണ്ടിരിക്കുന്ന മലയാളം ഫീച്ചര് ഫിലിം 'ചുരുളി' സിനിമയുടെ സര്ട്ടിഫൈഡ് പതിപ്പല്ലെന്ന് സെന്ട്രല് ബോര്ഡ് ഓഫ് ഫിലിം സര്ട്ടിഫിക്കേഷന് (CBFC) റീജിയണല് ഓഫീസര് പാര്വതി വി അറിയിച്ചു.
ചുരുളി മലയാളം ഫീച്ചര് ഫിലിമിന് സിനിമാട്ടോഗ്രാഫ് ആക്ട് 1952, സിനിമാട്ടോഗ്രാഫ് സര്ട്ടിഫിക്കേഷന് റൂള്സ് -1983, ഇന്ത്യാ ഗവണ്മെന്റ് പുറപ്പെടുവിച്ച മാര്ഗ്ഗനിര്ദ്ദേശങ്ങള് എന്നിവക്ക് അനുസൃതമായി സിബിഎഫ്സി എ സര്ട്ടിഫിക്കറ്റ് തന്നെയാണ് ലഭ്യമാക്കിയിട്ടുള്ളത്. 2021 നവംബര് 18നാണ് സര്ട്ടിഫിക്കറ്റ് നമ്ബര് DIL/3/6/2021-THI പ്രകാരം അനുയോജ്യമായ മാറ്റങ്ങളോടെ 'എ' സര്ട്ടിഫിക്കറ്റ് ലഭ്യമാക്കിയത്.
സമൂഹ മാധ്യമങ്ങളില് ചുരുളി സിനിമയുടെ സര്ട്ടിഫിക്കേഷനെ സംബന്ധിച്ച് ഊഹാപോഹങ്ങളും തെറ്റായ റിപ്പോര്ട്ടുകളും വ്യാപകമാവുന്നതായി പൊതുജനങ്ങളില് നിന്നും ലഭിച്ച പരാതികളിലൂടെ ബോധ്യപ്പെട്ടതായും സിബിഎഫ്സി റീജിയണല് ഓഫീസര് അറിയിച്ചു.