സംസ്ഥാനത്തെ ലോക് ഡൗണ്‍ ഇളവുകള്‍ ഇങ്ങനെ

Ajith.A

15 June 2021 07:09 PM

തിരുവനന്തപുരം:  ലോക്ഡൗണ്‍ ബുധനാഴ്ച മുതല്‍ ലഘൂകരിക്കാന്‍ തീരുമാനിച്ചതായി മുഖ്യമന്ത്രി പിണറായി വിജയന്‍. വാര്‍ത്താസമ്മേളനത്തിലാണ് മുഖ്യമന്ത്രി ഇക്കാര്യം അറിയിച്ചത്. ഏപ്രില്‍ മാസം അവസാനത്തോടെ ആരംഭിച്ച കോവിഡ് രണ്ടാംതരംഗം കുറഞ്ഞതിനാലാണ് ഇളവ് അനുവദിക്കാന്‍ തീരുമാനിച്ചത്.

ശനി, ഞായര്‍ ദിവസങ്ങളില്‍ പൂര്‍ണ ലോക്ഡൗണായിരിക്കും. ബവ്‌കോ ഔട്‌ലെറ്റുകളും ബാറുകളും രാവിലെ ഒമ്ബത് മണി മുതല്‍ വൈകിട്ട് ഏഴുമണിവരെ പ്രവര്‍ത്തിക്കും. ആപ് മുഖാന്തിരം സ്ലോട്ട് ബുക് ചെയ്യാം. ഷോപില്‍ ആള്‍ക്കൂട്ടം ഉണ്ടാകാതിരിക്കാനുള്ള കരുതല്‍ സ്വീകരിക്കും.

ടെസ്റ്റ് പോസിറ്റിവിറ്റിയുടെ (ടിപിആര്‍) അടിസ്ഥാനത്തിലാണ് നിയന്ത്രണങ്ങളില്‍ ഇളവ് അനുവദിക്കുന്നത്. തദ്ദേശ സ്ഥാപനങ്ങളിലെ ഏഴു ദിവസത്തെ ടിപിആര്‍ നിരക്ക് എട്ടുശതമാനം ആണെങ്കില്‍ രോഗം കുറവുള്ള സ്ഥലമാണ്. 20% വരെ മിതമായ സ്ഥലം. 20ന് മുകളില്‍ അതിവ്യാപന മേഖല. 30ന് മുകളിലാണെങ്കില്‍ കൂടുതല്‍ നിന്ത്രണങ്ങള്‍ നടപ്പിലാക്കും.

എല്ലാ ബുധനാഴ്ചയും ആ ആഴ്ചയിലെ തദ്ദേശ സ്ഥാപനങ്ങളുടെ ടിപിആര്‍ അവലോകനം ചെയ്യും. തദ്ദേശ സ്ഥാപനം ഏത് വിഭാഗത്തില്‍പ്പെടുന്നു എന്ന് പരസ്യപ്പെടുത്തും. വ്യാപനത്തോത് നോക്കി തദ്ദേശ സ്ഥാപനങ്ങള്‍ക്ക് പരിശോധനയ്ക്കു ടാര്‍ഗറ്റ് നല്‍കും. ഓരോ വീട്ടിലും ആദ്യം പോസിറ്റീവാകുന്ന വ്യക്തി കരുതല്‍ വാസ കേന്ദ്രത്തില്‍ ക്വാറന്റൈന്‍ ചെയ്യണം. വീടുകളില്‍ സൗകര്യമുള്ളവര്‍ മാത്രമേ വീടുകളില്‍ ക്വാറന്റൈനില്‍ കഴിയാന്‍ പാടുള്ളൂ.

ടെസ്റ്റ് പോസിറ്റിവിറ്റി കൂടുതലുള്ള പഞ്ചായത്തുകളെ കണ്ടെത്തി കണ്ടൈന്‍മെന്റ് സോണാക്കും. അപകട സൂചന നല്‍കുന്ന പഞ്ചായത്തുകളില്‍ അധിക നിയന്ത്രണം ഏര്‍പെടുത്തും. ടിപിആര്‍ എട്ടു ശതമാനം വരെയുള്ള സ്ഥലങ്ങളില്‍ എല്ലാ കടകളും നിയന്ത്രണങ്ങളോടെ പ്രവര്‍ത്തിക്കാം.

ഈ സ്ഥലങ്ങളില്‍ വ്യാവസായിക, കാര്‍ഷിക പ്രവര്‍ത്തനം അനുവദിക്കും. ഈ മേഖലകളിലെ തൊഴിലാളികള്‍ക്കു യാത്ര ചെയ്യാന്‍ അനുവാദമുണ്ടാകും. അവശ്യ വസ്തുക്കള്‍ വില്‍ക്കുന്ന കടകള്‍ രാവിലെ ഏഴുമണി മുതല്‍ വൈകിട്ട് ഏഴുമണി വരെ തുറക്കാം.

പുതിയ ഇളവുകള്‍:

* അവശ്യവസ്തുക്കളുടെ കടകള്‍ രാവിലെ 7 മുതല്‍ വൈകിട്ട് 7 വരെ തുറക്കാം.

*എല്ലാ പൊതുപരീക്ഷകള്‍ക്കും അനുമതി

* വിവാഹം, മരണാനന്തര ചടങ്ങില്‍ 20 പേര്‍.

* ജൂണ്‍ 17 മുതല്‍ കേന്ദ്രസംസ്ഥാന സര്‍കാര്‍ ഓഫിസുകള്‍, പൊതുമേഖലാ സ്ഥാപനങ്ങള്‍, കമ്ബനികള്‍, കോര്‍പറേഷനുകള്‍, സ്വയംഭരണ സ്ഥാപനങ്ങള്‍ തുടങ്ങിയവയില്‍ 25 ശതമാനം ജീവനക്കാരുമായി എല്ലാ ദിവസവും പ്രവര്‍ത്തിക്കാം.

* സെക്രടറിയറ്റില്‍ 50 ശതമാനം വരെ ജീവനക്കാര്‍ക്കു പ്രവര്‍ത്തിക്കാം.

*ജൂണ്‍ 17 മുതല്‍ പൊതുഗതാഗതം മിതമായ രീതിയില്‍.

* ബാങ്കുകളുടെ പ്രവര്‍ത്തനം തിങ്കള്‍, ബുധന്‍ വെള്ളി ദിവസങ്ങളില്‍.

* ആള്‍ക്കൂട്ടമോ പൊതുപരിപാടിയോ അനുവദിക്കില്ല. എല്ലാ മേഖലയിലും ഇളവ് ഉണ്ടാകില്ല.

*റസ്റ്ററന്റുകളില്‍ ഇരുന്നു ഭക്ഷണം കഴിക്കാനാകില്ല. ഹോം ഡെലിവറിയും പാഴ്‌സലും അനുവദിക്കും.

*വിനോദപരിപാടികളും ഇന്‍ഡോര്‍ പ്രവര്‍ത്തനവും അനുവദിക്കില്ല. മാളുകളുടെ പ്രവര്‍ത്തനവും അനുവദിക്കില്ല.

* ബെവ്‌കോ ഓട്ലെറ്റുകളും ബാറുകളും തുറക്കും. ബെവ്ക്യൂ ആപിന്റെ അടിസ്ഥാനത്തിലായിരിക്കും ഇവ പ്രവര്‍ത്തിക്കുക. പ്രവൃത്തി സമയം രാവിലെ 9 വരെ വൈകിട്ട് 7 വരെ.