ടെലഗ്രാമിന് തിരിച്ചടി; നിരോധനം ശരിവച്ച് ഡല്‍ഹി ഹൈക്കോടതി
രാജ്യത്ത് ടെലഗ്രാമിന്റെ (Telegram) സേവനങ്ങൾ താത്കാലികമായി നിർത്തിവെച്ച കേന്ദ്ര സർക്കാർ നടപടി ഡൽഹി ഹൈക്കോടതി ശരിവച്ചു. കേന്ദ്ര ഉത്തരവിനെ ചോദ്യം ചെയ്ത് ടെലഗ്രാം സമർപ്പിച്ച ഹർജി കോടതി തള്ളി. രാജ്യത്തെ ഐടി നിയമം (IT Act) അനുസരിച്ച് ഇത്തരത്തിൽ നിരോധനം ഏർപ്പെടുത്താൻ കേന്ദ്ര സർക്കാരിന് പൂർണ്ണ അധികാരമുണ്ടെന്ന് ഹൈക്കോടതി വ്യക്തമാക്കി. തിങ്കളാഴ്ച (ജൂൺ 22) വരെയാണ് നിലവിൽ ടെലഗ്രാമിന് രാജ്യത്ത് താത്കാലിക നിരോധനം ഏർപ്പെടുത്തിയിരിക്കുന്നത്.
കേന്ദ്ര സർക്കാരിന്റെ ഈ നടപടിയിൽ യാതൊരു തെറ്റുമില്ലെന്നും, ഉത്തരവിന് പിന്നിൽ കൃത്യമായ അടിസ്ഥാനവും അതിനെ പിന്തുണയ്ക്കുന്ന വ്യക്തമായ കാരണങ്ങളുമുണ്ടെന്നും കോടതി നിരീക്ഷിച്ചു. ജസ്റ്റിസ് തേജസ് കാരിയയാണ് കേന്ദ്രത്തിന്റെ താല്കാലിക നിരോധന ഉത്തരവ് ശരിവച്ചുകൊണ്ട് വിധി പുറപ്പെടുവിച്ചത്. ഇതോടെ തിങ്കളാഴ്ച വരെ രാജ്യത്ത് ടെലഗ്രാം സേവനങ്ങളുടെ മേലുള്ള നിയന്ത്രണം തുടരും.
