മല്ലിക സുകുമാരനും രാജിവച്ചു; അഡ്ഹോക്ക് കമ്മിറ്റിയിലും രാജി

മലയാള സിനിമാ താരങ്ങളുടെ സംഘടനയായ ‘അമ്മ’യിൽ (AMMA) ആഭ്യന്തര തർക്കങ്ങളെത്തുടർന്നുള്ള നാടകീയ രംഗങ്ങളും കൂട്ടരാജിയും തുടരുന്നു. പ്രസിഡന്റ് ശ്വേതാ മേനോന്റെ നേതൃത്വത്തിലുള്ള ഭരണസമിതി ഒന്നടങ്കം രാജിവെച്ചതിന് തൊട്ടുപിന്നാലെ, മുതിർന്ന നടി മല്ലിക സുകുമാരൻ സംഘടനയുടെ പ്രാഥമിക അംഗത്വത്തിൽ നിന്നും രാജിവെച്ചു. കൂടാതെ, താൽക്കാലികമായി രൂപീകരിച്ച ഒമ്പതംഗ അഡ്ഹോക്ക് (Ad-hoc) കമ്മിറ്റിയിൽ നിന്നും നടി ആശ അരവിന്ദ് പിന്മാറിയതായും പ്രഖ്യാപിച്ചു.

ഫേസ്ബുക്ക് പോസ്റ്റിലൂടെയാണ് മല്ലിക സുകുമാരൻ തന്റെ രാജിവിവരം ഔദ്യോഗികമായി പുറത്തുവിട്ടത്. സ്നേഹത്തോടെ പടിയിറങ്ങുന്നുവെന്നും സത്യത്തിനും ന്യായത്തിനും ശ്വേതാ മേനോനും ഒപ്പമാണെന്നും അവർ കുറിച്ചു. കഴിഞ്ഞ ദിവസം നടന്ന ജനറൽ ബോഡി യോഗത്തിൽ വാർഷിക കണക്കവതരണവുമായി ബന്ധപ്പെട്ടുണ്ടായ കടുത്ത തർക്കങ്ങൾക്കൊടുവിലാണ് ശ്വേതാ മേനോന്റെ നേതൃത്വത്തിലുള്ള ഭരണസമിതി രാജിവെച്ചത്. ശ്വേതയെയല്ല, മറിച്ച് സാമ്പത്തിക കണക്കുകളിൽ കൃത്യതയില്ലാത്തതിന്റെ പേരിൽ ജനറൽ സെക്രട്ടറിയും ട്രഷററുമാണ് യഥാർത്ഥത്തിൽ രാജിവെക്കേണ്ടിയിരുന്നതെന്ന് മല്ലികാ സുകുമാരൻ മാധ്യമങ്ങളോട് പ്രതികരിച്ചു. ഇതിനിടെ, ഭരണസമിതി ഒഴിഞ്ഞതിനെ തുടർന്ന് രൂപീകരിച്ച ഇടക്കാല സമിതിയിൽ നിന്നാണ് സഹപ്രവർത്തകരുടെ കൂട്ടരാജിയിലുള്ള വിഷമം പ്രകടിപ്പിച്ച് ആശ അരവിന്ദ് അപ്രതീക്ഷിതമായി പിന്മാറിയത്. താരസംഘടനയ്ക്കുള്ളിൽ ചേരിതിരിവ് കടുത്തതോടെ നടി ലക്ഷ്മിപ്രിയയും സംഘടനയിൽ നിന്നും രാജിവെക്കുന്നതായി പ്രഖ്യാപിച്ചിട്ടുണ്ട്.