ബർഗ്മാന് ആരാധകരേറുന്നു | സവിശേഷതകൾ ഇങ്ങനെ
ജാപ്പനീസ് ഇരുചക്ര വാഹന നിർമാതാക്കളായ സുസുക്കി ഇന്ത്യയിലെ ഏക മാക്സിസ്കൂട്ടർ മോഡലായ ബർഗ്മാൻ സ്ട്രീറ്റിന്റെ പുതിയ പതിപ്പിന് ആരാധകരേറുന്നു. ഭാരത് സ്റ്റേജ് 6 മലിനീകരണ നിയന്ത്രണ മാനദണ്ഡങ്ങൾക്കനുസരിച്ച് എൻജിൻ പരിഷ്കരിച്ചതോടൊപ്പം പുത്തൻ നിറവും 2020 ബർഗ്മാൻ സ്ട്രീറ്റ് ശ്രേണിയിൽ സുസുക്കി അവതരിപ്പിച്ചിട്ടുണ്ട്. 77,900 രൂപയാണ് പുത്തൻ ബർഗ്മാൻ സ്ട്രീറ്റിന്റെ എക്സ്-ഷോറൂം വില. ഇതുവരെ വില്പനയിലുണ്ടായിരുന്ന BS4 ബർഗ്മാൻ സ്ട്രീറ്റിനെക്കാൾ Rs 7,000 രൂപ കൂടുതലാണ് പുത്തൻ മോഡലിന്.
കാർബുറേറ്ററിന് പകരം ഫ്യുവൽ ഇൻജെക്ഷൻ സാങ്കേതിക വിദ്യ കൂട്ടിച്ചേർത്താണ് ബർഗ്മാൻ സ്ട്രീറ്റിലെ 125 സിസി സിംഗിൾ സിലിണ്ടർ എഞ്ചിനിൽ സുസുക്കി പരിഷ്കരിച്ചത്. കാർബുറേറ്റഡ് മോഡലിനേക്കാൾ മികച്ച പവർ ഡെലിവെറിയും ഇന്ധനക്ഷമതയും പരിഷ്ക്കരിച്ച എൻജിൻ തരും എന്ന് സുസുക്കി അവകാശപ്പെടുന്നു. 8.7 ബിഎച്ച്പി പവറും 10 എൻഎം ടോർക്കുമാണ് പുതുക്കിയ എഞ്ചിൻ ഉത്പാദിപ്പിക്കുന്നത്. പവർ BS4 എഞ്ചിന് സമാനമാണെങ്കിലും ടോർക്ക് 0.2 എൻഎം പരിഷ്കരിച്ച എൻജിനിൽ കുറഞ്ഞിട്ടുണ്ട്. സുസുക്കി ഈസി സ്റ്റാർട്ട് സിസ്റ്റത്തിനൊപ്പം പുതിയ ഇന്റഗ്രേറ്റഡ് എഞ്ചിൻ സ്റ്റാർട്ട് ആൻഡ് കിൽ സ്വിച്ച് ആണ് 2020 ബർഗ്മാൻ സ്ട്രീറ്റിലെ മറ്റൊരു അപ്ഡേറ്റ്.
വലിപ്പം കൂടിയ വിൻഡ്സ്ക്രീൻ, എൽഇഡി ഹെഡ്ലാമ്പ്, ടേൺ ഇൻഡിക്കേറ്ററുകൾ എന്നിവ ഉൾക്കൊള്ളുന്ന വീതിയേറിയ ഏപ്രോൺ, വലിപ്പമേറിയ സെറ്റ് എന്നിങ്ങനെ ബർഗ്മാൻ സ്ട്രീറ്റ് മോഡലിന്റെ പ്രത്യേകതകൾക്ക് മാറ്റമൊന്നും വരുത്തിയിട്ടില്ല. അതെ സമയം മാറ്റ് ഗ്രേ, വൈറ്റ്, മാറ്റ് ബ്ലാക്ക് എന്നീ നിലവിലുള്ള കളറുകൾക്കൊപ്പം മെറ്റാലിക് മാറ്റ് ബോർഡെക്സ് റെഡ് എന്നൊരു പുത്തൻ കളർ ഓപ്ഷൻ 2020 വേർഷനിൽ അവതരിപ്പിച്ചിട്ടുണ്ട്.
മാക്സി സ്കൂട്ടറിന്റെ സൈക്കിൾ പാർട്സിലും സുസുക്കി മാറ്റങ്ങൾ വരുത്തിയിട്ടില്ല. 12 ഇഞ്ച് മുൻ ചക്രവും, 10 ഇഞ്ച് പിൻ ചക്രവുമാണ് ബർഗ്മാൻ സ്ട്രീറ്റിന്. ടെലിസ്കോപ്പിക് മുൻ ഫോർക്കുകളും മോണോഷോക്ക് പിൻ സസ്പെൻഷനുമാണ്. കോമ്പി ബ്രെയ്ക്ക് സിസ്റ്റത്തോടൊപ്പം പ്രവർത്തിക്കുന്ന മുന്നിൽ ഡിസ്കും, പുറകിൽ ഡ്രം ബ്രെയ്ക്കുമാണ് ബർഗ്മാൻ സ്ട്രീറ്റിന്.